Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 141 Hüküm no: 104 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Derviş Efendi’nin küçük oğlu Mustafa Rakım’a intikal eden bağ hissesinin diğer varislerin hissesi ile beraber satılması Mahmiye-i İslambol’da Peykhâne kurbünde Uzunşücâ‘eddin mahallesi sâkinlerinden Enderûn-ı hümâyûn’dan muhrec Mehmed Nuri Ağa b. Salih’in şer‘iyyât mahkemesinde mukayyed mübâya‘a hücceti. Asıl târîh-i hüccet fî 20 Ş sene [1]242 Derûn-ı hüccetde ismi mezkûr es-Seyyid Mehmed Derviş Efendi vefât edip verâseti zevce-i menkûha-i metrûkesi Fâtıma Handan bt. Mustafa Fehim ile sulbiye-i kebîre kızı Münire Hanım ve sulbî sagīr oğlu Mustafa Rakım’a ba‘de’l-inhisâr sagīr-i mezbûrun vâlidesi ve tesviye-i umûruna vasiyy-i mansûbesi olup zâtı ta‘rîf-i şer‘î ile mu‘arrefe olan zevce-i mezbûre Fâtıma Hatun meclis-i şer‘-i şerîf-i enverde zâtı [23b] kezâlik ta‘rîf-i şer‘î ile mu‘arrefe olan bint-i mezbûre Münire Hanım hâzıra olduğu hâlde Müslimin mülkünü şirâ ve yine Müslime bey‘ eylemek âdeti olan Yağcıoğlu Nikola Kalfa kızı Sofiçe Nasrâniye tarafından husûs-ı âti’l-beyânı tasdîka vekîl-i şer‘îsi Cani v. Yani zimmî muvâcehesinde bi’l-verâse ve bi’l-vesâye ikrâr ve takrîr-i kelâm edip derûn-ı hüccetde tahdîd ve tavsîf olunan etrâfı taş duvar ile muhât el-yevm derûnunda mevcûde tahtânî ve fevkānî dört bâb oda ve bir kenîf ve bir âbdesthâne ve bir matbah ve bir mikdâr havlu ve müştemilât-ı sâire-i ma‘lûmeyi muhtevî yirmi altı dönüm mikdârı bir kıt‘a bağ zevcim müteveffâ-yı mezbûrun ile’l-vefât yedinde malı ve mülkü olup ba‘de vefâtihî benim ile vasîsi olduğum oğlum sagīr-i mezbûre ve hâzıra-i mezbûreye mevrûs olup lâkin bağ-ı mahdûd-ı mezkûrdan ben ve hâzıra-i mezbûre hisselerimizi âhara bey‘a âzimeler olup sagīr-i mezbûrun hissesi kendüye nef‘ verir vech üzere ifrâz mümkün olmayıp mâ‘adâ bağ-ı mahdûd-ı mezkûr ânen feânen harâba müşrif ve hâsılı harcına vefâ etmeyip bakāsı sagīr-i mezbûra muzır ve sagīr-i mezbûr nafaka ve kisveye dahi eşedd-i ihtiyâc ile muhtâc olmağla bağ-ı mahdûd-ı mezkûrdan sagīr-i mezbûrun hissesi benim ve hâzıra-i mezbûrenin hisselerimiz ile ma‘an âhara bey‘ ve semeninden hissesi istirbâh ve istiğlâl olunmak sagīr-i mezbûr hakkında her vechile enfa‘ ve evlâ olmağın bağ-ı mahdûd-ı mezkûrdan sagīr-i mezbûrun hissesi benim ve hâzıra-i mezbûrenin hisselerimiz ile ma‘an âhara bey‘a kıbel-i şer‘den bi’l-vesâye me’zûne olmamla bağ-ı mahdûd-ı mezkûr sûk-ı sultânî ve mecma‘-ı nâs olan mahallerde nidâ ve müzâyede olunup ragabât-ı nâs bi’l-külliye münkatı‘a oldukdan sonra müvekkile-i mersûme Sofiçe Nasrâniye üzerinde otuz bin guruşda karâr ve ziyâde ile tâlib-i âharı zuhûr etmeyip ve meblağ-ı merkūm mebî‘-i mezkûrun el-yevm semen-i misli idüğü zeyl-i hâmişde muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olmağın bağ-ı mahdûd-ı mezkûru bâ-irâde-i seniyye taraf-ı hazret-i fetvâ-penâhîden mürsel Danişmend Mehmed Emin Efendi ve Ebniye-i hâssa Müdürü hülefâsından el-Hâc Ali Efendi ma‘rifetiyle ba‘de’l-keşf ve’r-rü’ye bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile meblağ-ı merkūm otuz bin guruşa müvekkile-i mersûme Sofiçe Nasrâniyeye ben bi’l-verâse ve bi’l-vesâye ve hâzıra-i mezbûre dahi bi’l-verâse bey‘ ü temlîk ve teslîm eylediğimde ol dahi yedimizden ber-vech-i muharrer iştirâ ve temellük ve tesellüm ve kabz ü kabûl edip semeni olan meblağ-ı merkūm otuz bin guruşu vekîl-i mersûm Cani zimmî işbu meclis-i şer‘de bana ve hâzıra-i mezbûreye tamâmen ve kâmilen def‘ ü teslîm eylediğinde biz dahi yedinden bi’l-verâse ve bi’l-vesâye bi’t-tamâm ve’l-kemâl ahz u kabz ve müteveffâ-yı mezbûrun defter-i kassâmına idhâl eyledik, fîmâ-ba‘d mebî‘-i mezkûrun gabn ve tağrîrine müte‘allika âmme-i de‘âvî ve mutâlebât ve kâffe-i eymân ve muhâsamâtdan müvekkile-i mersûme Sofiçe Nasrâniyenin ve vekîl-i mersûm Cani zimmînin zimmetlerini ibrâ-i âmm-ı sahîh-i şer‘î ile ben ve hâzıra-i mezbûreden her birimiz bi’l-verâse ibrâ ve iskāt eylediğimizde ol dahi husûs-ı mezkûre müte‘allika kezâlik âmme-i da‘vâdan benim ve hâzıra-i mezbûrenin ve sagīr-i mezbûrun zimmetlerimizi ibrâ ve iskāt ve her birimiz ber-vech-i muharrer âharın ibrâsını kabûl edip ba‘ed’l-yevm bağ-ı mahdûd-ı mezkûrda benim ve sagīr-i mezbûrun ve hâzıra-i mezbûrenin aslâ ve kat‘â alâka ve medhallerimiz kalmayıp müvekkile-i mersûme Sofiçe Nasrâniyenin mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasâduki’ş-şer‘î mâ-vaka‘a bi’t-taleb ketb olundu. Fî 18 C sene [1]256. Şuhûdü’l-hâl: Muhzır Ahmed Nuri Ağa, Hasan Ağa tâbi‘-i muhzır, Ali Ağa tâbi‘-i muhzır, Münâdî Hasan Ağa, Fesçi es-Seyyid el-Hâc Salih Ağa, es-Seyyid Mehmed Aşır Efendi.