Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 143 Hüküm no: 105 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Ağa’nın Üsküdar Küçükhamam’da kaybolan paralarının hamam tezgahtarından tazmin edilmesi talebi İstanbul’da Tahtakale kurbünde Kebabçı Hanı’nda sâkin sâhib-i arzuhâl Mehmed Emin Ağa b. Hüseyin nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde medîne-i Üsküdar’da vâki‘ Küçük Hamam destgâhdârı Veliyyüddin b. İbrahim nâm kimesne muvâcehesinde mezbûr Veliyyüddin’in yedinde olup şehr-i sâbık Cumâdelâhire’nin on birinci günü târîhiyle müverrah medîne-i mezkûre mahkemesinden verilen işbu bir kıt‘a i‘lâm-ı şer‘î nâtık olduğu üzere ben târîh-i i‘lâm-ı mezkûrdan bir gün mukaddem tathîr-i ebdân için hamam-ı mezkûre vardığımda hamam-ı mezkûrun câmekânında kimesnenin emrinsiz soyunup hamam-ı mezbûre duhûl ve ba‘dehu hurûc eylediğimde lâbis olduğum yeleğimin koyun cebinde mevzû‘ bir göğez sandal kese derûnunda mevcûde malımdan iki yüz kırk beş guruşluk ecnâs altın ile yirmi dirhem sîm en‘âm gılâfı kimesnenin sun‘suz zâyi‘ olmağla gılâf-ı mezkûr ile meblağ-ı mezbûr iki yüz kırk beş guruşu mücerred mezbûr Veliyyüddin hamam-ı mezkûrun destgâhdârı olduğuna binâen bana malından edâya mezbûr Veliyyüddin’e cebr ve tenbîh olunmak murâdımdır deyü takrîr-i meşrûhum üzere tasaddî eylediğim da‘vâm meşrû‘a ve iltifâta şâyân olmadığı kıbel-i şer‘den bana tefhîm ve da‘vâ-yı [24a] mezkûremden merkūm Veliyyüddin’e bî-vech-i şer‘î mu‘ârazadan men‘ olunmuş idim. Lâkin ben kāni‘ ve mülzem olmamamla öyle olucak gılâf-ı mezkûr ile meblağ-ı merkūm iki yüz kırk beş guruşu destgâhdâr-ı mezbûr bana malından edâ etsin deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı kendüye tefhîm ve da‘vâ-yı mezkûresiyle mezbûr Veliyyüddin’e tekrâr bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî-gurreti B sene [1]256.