Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 144 Hüküm no: 106 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkçı Astori’nin Yani’nin evine giden yolu kapatmaması gerektiği Ma‘rûz, Sâdır olan fermân-ı âlîlerine imtisâlen zikri âtî husûsun mahâllinde ketb ü tahrîri için savb-ı şer‘-i enverden me’zûnen irsâl olunan müderrisîn-i kirâmdan Kâtib es-Seyyid Ahmed Hıfzı Efendi bi’l-ma‘iyye rü’yete memûr evkāf müfettişi mevâlî-i i‘zâmdan fazîletlü es-Seyyid Mehmed Emin Âsaf Beyefendi tarafından meb‘ûs Kâtib Hasan Şükrü Efendi ve Ebniye-i hâssa Müdürü Efendi tarafından mürsel Mehmed Rüşdü ve el-Hâc Ali Halîfeler ile medîne-i Üsküdar’a muzâfe Kartal nâhiyesine tâbi‘ Heybeliada’da kâin bir tarafdan ba‘zen Kayıkçı Kostandi ve ba‘zen Balıkçı Dimitri zimmîler menzilleri ve ba‘zen Kroşni ve ba‘zen Filori Nasrâniyeler ve ba‘zen Balıkçı Haralambo zimmî menzilleri ve ba‘zen Fıçıcı Kosti zimmî arsası ve ba‘zen Şerbethâneci Dimitri ve Aci İstemat zimmîler menzilleri ve ba‘zen Nikola oğulları Yorgi ve Vasil zimmîler ile Balıkçı Nikoli zimmî arsaları ve ba‘zen Dimitri zimmî menzil ve dükkânı ve bir tarafdan diğer Dimitri ve Yorgi zimmîler bağları ve bir tarafdan Selvili Manastırı demekle meşhûr manastırın bağ ve tarlası ve taraf-ı râbi‘i tarîk-i hâs ile mahdûd derûnunda kürûmu ve eşcârı hâvî bir kıt‘a bağı müştemil arsası Haremeyn-i muhteremeyne mülhak evkāfdan merhûm cennet-mekân Şehzâde Sultan Mehmed hazretleri Evkāf-ı şerîfelerine senevî altmış para mukāta‘a-yı kadîmeli ve üzerinde mevcûd bi’l-cümle ebniye ve kürûm ve eşcârı mülk bir bâb menzile varıp huzûr-ı Müslimînde akd-i meclis-i şer‘-i âlî etdiklerinde menzil-i mahdûd-ı mezkûra bâ-hüccet-i şer‘iyye müstakıllen mâlik olan Avrupa Tüccârı’ndan arzuhâl eden Yani v. Kostandi v. Adam zimmînin sulbî kebîr oğlu ve tarafından husûs-ı âti’l-beyânda vekîl olduğu Tafaş v. Yorgi ve Dimitri v. Aleksi nâm zimmîler şehâdetleriyle ber-nehc-i şer‘î sâbit olan Yorgi nâm zimmî meclis-i ma‘kūd-ı mezkûrda ada-i mezkûr re‘âyâsından olup tarîk-i hâss-ı mezkûra muttasıl vakf-ı müşârün-ileyh arazisinden kürûmu mülk bir kıt‘a bağa kezâlik bâ-hüccet mâlik olan derûn-ı arzuhâlde ismi mastûr Balıkçı Astori v. Nikola nâm zimmî muvâcehesinde ricâl-i Devlet-i aliyye’den hâlâ Evkāf-ı Haremeyn-i şerifeyn nâzırı atûfetlü es-Seyyid Mehmed Şevki Efendi hazretleri taraflarından mürsel Osman Ağa b. Mehmed hâzır olduğu hâlde müvekkilim babam mersûmun ber-minvâl-i muharrer mâlik olduğu menzil-i mahdûd-ı mezkûreynin kapısı halîfetân-ı mezbûrân misâhalarıyla kadîmden beri yüz yirmi zirâ‘ tûlünde ve üç zirâ‘ arzında olan tarîk-i hâss-ı mezkûre mekşûf [ve] ol vechile menzil-i mahdûd-ı mezkûra tarîk-i hâss-ı merkūmdan mürûr olunagelir iken mesfûr Astori zimmî bu esnâda tarîk-i hâss-ı merkūmun mecmû‘unu babam müvekkilim mersûmun izinsiz bağ-ı mezkûruna ilâve ve tarîk-i hâss-ı merkūmu külliyen sedd ü bend ile babam müvekkilim mersûmun menzil-i mahdûd-ı mezkûruna mürûruna mümâna‘at etmekle suâl olunup ber-minvâl-i muharrer bağ-ı mezkûruna ilâve eylediği yüz yirmi zirâ‘ tûlünde ve üç zirâ‘ arzında kadîm olan tarîk-i hâss-ı mezkûru ke’l-evvel tarîk-i hâs olmak üzere terk birle babam müvekkilim mesfûrun mürûruna mümâna‘at etmemek üzere mersûm Astori zimmîye tenbîh olunmak bi’l-vekâle matlûbumdur deyü hâzır-ı mezbûr Osman Ağa’nın tasdîkiyle da‘vâ etdikde, ol dahi cevâbında kaziyye minvâl-i muharrer üzere olduğunu tâyi‘an ve kat‘iyyen ikrâr ü i‘tirâf edip ber-minvâl-i muharrer bağ-ı mezkûruna ilâve eylediği kadîm tarîk-i hâss-ı mezkûru ke’l-evvel tarîk-i hâs olmak üzere terk birle müvekkilim mersûm Yani zimmînin mürûruna mümâna‘at etmemeğe ta‘ahhüd eylediğinde müdde‘î-i vekîl-i mesfûr Yorgi zimmî dahi kabûl ve bu vechile kat‘-ı münâza‘a eylediklerini kâtibân-ı mûmâ-ileyhimâ mahâllinde ketb ü tahrîr ve ma‘an meb‘ûs ümenâ-i şer‘le Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i şerîfe gelip tarafeyn bi-ecma‘ihim hâzır oldukları hâlde tasdîklerine mukārin alâ-vukū‘ihî inhâ ve takrîr eyledikleri tescîl ve huzûr-ı âlîlerine i‘lâm olundu. Fî 27 C sene [1]256