Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 145 Hüküm no: 107 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Feyzullah’ın vefat eden tüccar Mahmud Ağa’nın varisi olduğunun tescili Medîne-i Üsküdar’da Selman Ağa mahallesinde sâkin iken şehr-i sâbık Cemâziyelâhire’nin yirmi yedinci günü vefât eden tüccârdan Mahmud Ağa’nın babası müteveffâ Süleyman’ın li-ebeveyn ammi müteveffâ el-Hâc Mustafa’nın sulbî oğlu müteveffâ Feyzullah’ın sulbî sahîh oğlu ve usûbete-i nesebiye cihetinden vârisi olup ve ber-vech-i âtî verâset iddi‘â eden derûn-ı arzuhâlde mezkûrü’l-ism Mustafa nâm kimesne Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde müteveffâ-yı mezbûrun zevce-i menkûha-i metrûkesi olup terekesine bi’l-verâse vaz‘-ı yedi mütehakkık olan kezâlik derûn-ı arzuhâlde mezkûretü’l-ism mu‘arrefetü’z-zât Fâtıma Hatun bt. Abdullah muvâcehesinde müteveffâ-yı mezbûrun li-ebeveyn er karındaşı müteveffâ Mehmed Emin’in sulbiye kebîre kızı sâhibe-i arzuhâl kezâlik zâtı mu‘arrefe Feliha Hatun ile müteveffâ-yı merkūmun li-ebeveyn kız karındaşı müteveffât Münevvere Hatun’un sadriye kebîre kızı kezâlik derûn-ı arzuhâlde mezkûretü’l-ism Cemile Hatun bt. Abdullah’ın zevci ve tarafından husûs-ı âtîde vekîl-i müsbet-i şer‘îsi Osman Efendi b. Osman hâzır oldukları hâlde babam müteveffâ-yı mezbûr Feyzullah’ın babası müteveffâ-yı merkūm el-hâc Mustafa müteveffâ-yı mezbûr Mahmud Ağa’nın babası müteveffâ-yı mezbûr Süleyman’ın babası müteveffâ el-Hâc Ali ile li-ebeveyn er karındaşlar olup babaları ismi Tığlı el-Hâc Mehmed ve dedeleri ismi Abdullah ve vâlideleri ismi Âişe bt. Abdullah ve maskat-ı re’sleri medîne-i mezkûrede Hamza Fakih mahallesi olup ol vechile [24b] müteveffâ-yı mezbûr Mahmud Ağa’nın verâseti zevcesi mezbûre Fâtıma Hatun ile usûbet-i nesebiye cihetinden bana münhasıra olup bizden gayrı vâris ve terekesine müstahıkk-ı âharı yoğiken zevce-i mezbûre Fâtıma Hatun müteveffâ-yı mezbûrun terekesinin mecmû‘unu bi’l-verâse kabz ve vaz‘-ı yed etmekle makbûzundan hisse-i irsiyemi bana teslîme zevce-i mezbûre Fâtıma Hatun’a tenbîh olunmak matlûbumdur deyü da‘vâ etdikde ol dahi cevâbında tereke-i müteveffâ-yı mezbûreyi kabz ve vaz‘-ı yedini ikrâr, mâ‘adâ müdde‘âmı mezbûrun ber-vech-i muharrer verâset müdde‘âsını asıl ve vekîl-i mezbûrân Faliha Hatun ve Osman Efendi’den her biri bi’l-asâle ve bi’l-vekâle külliyen inkâr etmeleriyle müdde‘î-i mezbûr Mustafa’dan ber-vech-i meşrûh müdde‘âsına mutâbık beyyine taleb olundukda udûl-i ahrâr-ı ricâl-i Müslimînden olup medîne-i mezkûre mahâllâtından Davudpaşa mahallesi ahâlîsinden Mehmed Asım b. Mustafa ve Ayazma mahallesi ahâlîsinden Mehmed Abdüllatif Ağa b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i merkūmun babası müteveffâ-yı mezbûr Feyzullah’ın babası müteveffâ-yı merkūm el-Hâc Mustafa müteveffâ-yı mezbûr Mahmud Ağa’nın babası müteveffâ-yı merkūm Süleyman’ın babası müteveffâ-yı mezbûr el-Hâc Ali ile li-ebeveyn er karındaşlar olup babaları ismi mezbûr Tığlı el-Hâc Mehmed ve vâlideleri ismi mezbûre Âişe bt. Abdullah ve maksat-ı re’sleri zikr olunan Hamza Fakih mahallesi olup ol vechile müdde‘î-i mezbûr Mustafa müteveffâ-yı merkūm Mahmud Ağa’nın babasının li-ebeveyn ammi oğlunun oğlu ve usûbet-i nesebiye cihetinden vârisdir biz bu husûsa bu vech üzere şâhidleriz şehâdet dahi ederiz deyü her biri müttefiku’l-lafz ve’l-ma‘nâ edâ-i şehâdet-i şer‘iyye etdiklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr Mustafa’nın verâsetine hüküm olunduğu tescîl ve huzûr-ı âlîlerine i‘lâm olundu. Fî 19 B sene [1]256.