Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 98 Hüküm no: 101 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maksud v. Sanan’ın menzilini Kayseri’deki Surp Karabet Manastırı’nın bitişiğindeki çeşmenin su yollarına ait vakfa önce satıp sonra kendisi için kiraladığı Kartal kasabasında mütemekkin Maksud v. Sinan nâm zimmî meclis-i şer‘-i lâzımü’t-tevkīrde vilâyet-i Anadolu’da Kayseriye kazâsına tâbi‘ Efkere nâm karye kurbünde Surp Karabet Manastırı ittisâlinde vâki‘ çeşmenin yolları ta‘mîri’çün akāra tebdîli meşrût nukūd-ı mevkūfeye meşrûtiyet üzere mütevellî olan işbu bâ‘isü’l-kitâb Panos v. Kirkor zimmî muvâcehesinde ikrâr-ı tâm ve takrîr-i kelâm edüp akd-i âti’z-zikrin sudûruna değin yedimde mülk ve hakkım olup kasaba-i mezbûrede vâki‘ bir tarafdan Kumru zimmî menzili ve bir tarafdan Korneş? veresesi mülkü ve kale hisarı ve bir tarafdan Avak zimmî menzili ve bir tarafdan tarîk-i âm ile mahdûd tûlen ve arzen bi-hesâb-ı terbî‘i seksen zirâ‘ arsada mebnî ulyâda bir bâb oda ve bir sofa ve bir tahte’s-semâ ve vüstâsında bir bâb oda ve bir sofa ve bir matbâh ve tahtında bir bâb oda ve bodrum ve avlu ve kenîf ve sokak kapısını müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile vakf-ı mezkûr içün mütevellî-i mersûm Panos zimmîye üç yüz guruşa bey‘ u teslîm eylediğimde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezkûrun yüz guruşunu mâl-ı vakf-ı mezkûrdan mütevellî-i mersûm yedinden ahz ü kabz edüp menzil-i mezkûr vakf-ı merkūm müstagallâtından oldukdan sonra mütevellî-i mezbûr bir kıt‘a temessük mantûkunca menzil-i mahdûd-ı mezkûru iki yüz guruş icâre-i mu‘accele ve beher yevm birer akçe icâre müeccele ile cânib-i vakfdan bi’t-tevliye bana icâr ve teslîm ve semeninden bâkī iki yüz guruş mu‘accele-i mezbûr iki yüz guruşa takās ve mahsûb eyledikde ben dahi ber-vech-i muharrer isticâr ve tesellüm ve mukāssa ve kabûl edüp mebî‘-i mezbûrun gabn ü tağrîrine ve mu‘accele-i mezkûrenin adem-i istîfâsına müte‘allıka âmme-i da‘vâdan cânib-i vakf-ı merkūm ile mütevellî-i merkūm Panos’dan her birini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 Recebi’l-ferd sene [1]181 Şuhûdü’l-hâl: Değirmenci Kirkor v. Panos, Keresteci Paskal v. Mosi, Aci Mikail v. Kasper, Hekim Avanis v. Mıgırdıç, Avak v. Safail, Aci Sahak v. Avanis, Bogos v. Bedros, ...? Filibos v. Nasi? Artin v. Kirkor mütevellî.