Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 146 Hüküm no: 108 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anderya’nın vefat eden Ziso v. Anderya’nın verasetinden dolayı Angero bt. Yani aleyhindeki menzil ve bahçe davası Ma‘rûz, Sâdır olan fermân-ı âlîlerine imtisâlen zikri âtî husûsun mahâllinde ketb ü tahrîri için savb-ı şer‘-i enverden me’zûnen irsâl olunan müderrisîn-i kirâmdan Kâtib es-Seyyid Ahmed Hıfzı Efendi bi’l-ma‘iyye rü’yete memûr evkāf müfettişi olup İstanbul pâyesiyle tekrîm buyurulan fazîletlü es-Seyyid Mehmed Emin Âsaf Beyefendi tarafından meb‘ûs Kâtib es-Seyyid Mehmed Eşref Efendi ve Ebniye-i hâssa Müdürü Efendi tarafından mürsel Mehmed Salih ve Mehmed Aziz Halîfeler ile medîne-i Üsküdar’a muzâfe Kuzguncuk karyesinde vâki‘ zikri âtî bir bâb menzil ve bir kıt‘a bahçeye varıp her birinde huzûr-ı Müslimînde akd-i meclis-i şer‘-i âlî etdiklerinde karye-i mezkûre re‘âyâsından olup iki yüz kırk sekiz senesi hilâlinde hâlik olan Ziso v. Anderya v. Adam zimmînin verâseti zevce-i metrûkesi Gonca bt. Hıristo ve sulbiye kebîre kızı Eleniko Nasrâniyeler ile li-ebeveyn kız karındaşı Anderya zimmîye münhasıra ve tashîh-i meselesi sekiz sehmden olup sihâm-ı mezbûreden bir sehmi zevcesi mersûmeye ve dört sehmi kızı mesfûreye ve bâkī üç sehmi karındaşı mersûme isâbeti tahakkukundan sonra verese-i mersûmûndan derûn-ı arzuhâlde ismi mastûr mersûm Anderya zimmî meclis-i ma‘kūd-ı mezkûrda sâhibe-i arzuhâl mu‘arrefetü’ş-şahs Angero bt. Yani nâm Nasrâniye muvâcehesinde ricâl-i Devlet-i aliyye’den ve hâlâ Evkāf-ı celîle ve Haremeyn-i muhteremeyn nâzırı olup Hüdâvendigâr-ı esbak cennet-mekân firdevs-âşiyân merhûm ve mağfiret-nişân Gāzî Sultan Abdülhamid Han -tâbe serâhu- hazretlerinin evkāf-ı şerîfeleri kāimmakām-ı mütevellîsi atûfetlü Numan Mahir Beyefendi hazretleri mürsel vekîl-i müseccel-i şer‘îleri câbî Mehmed Efendi b. Halil nâm kimesne ile şahısları mu‘arrefeler mersûmetân Gonce ve Eleniko Nasrâniyelerden her biri hâzır oldukları hâlde işbu derûnunda akd-i meclis-i şer‘-i âlî olunup bir tarafdan hâzıretân-ı mesfûretân Gonce Nasrâniyeler menzili ve tarafeyni tarîk-i âm ile mahdûd arsası vakf-ı müşârün-ileyh mülhakātından merhûm Abdullah Ağa Vakfı’na mukāta‘a-i ma‘lûmeli ve üzerinde mevcûde bi’l-cümle ebniyesi mülk bir bâb menzil ile menzil-i mezkûr sırasında kâin bir tarafdan Kosti zimmî veresesi ve bir tarafdan Kiratso zimmî menzilleri ve tarafeyni tarîk-i âm ile mahdûd kezâlik arsası vakf-ı mezkûre mukāta‘a-i ma‘lûmeli derûnunda mağrûs bi’l-cümle eşcâr ve enkāz-ı mevcûdesi mülk bir kıt‘a bahçe hâlik-i mersûm Ziso zimmînin sağlığında ile’l-helâk her biri bâ-hüccet-i şer‘iyye müstakıllen yedinde mülkü ve arsaları dahi dâhil-i havza-i tasarrufu olup ba‘de helâkihi menzil-i mahdûd-ı mezkûrun ebniyesiyle bahçe-i merkūmun eşcâr-ı mağrûse ve enkāz-ı mevcûdesi ber-tashîh-i mezkûr benimle hâzıretân-ı mersûmetân Gonce ve Eleniko Nasrâniyelere mevrûs ve arsaları dahi hâzıra-i mesfûre Eleniko Nasrâniyeye âdiyen ba‘de’l-intikāl hâzıretân-ı mersûmetân Gonce ve Eleniko Nasrâniyeler menzil-i mahdûd-ı mezkûrun ebniyesiyle bahçe-i mahdûd-ı mezkûrun eşcâr ve enkāz-ı mevcûdesinde hisse-i irsiye-i mezkûrelerini semen-i ma‘lûm ve makbûza bundan akdem bana bey‘ ve temlîk ve arsalarını dahi bâ-re’y-i mütevellî ferâğ ve tefvîz ve teslîm eylediklerinde ben dahi iştirâ ve temellük ve tefevvüz ve tesellüm ve kabûl edip ol vechile menzil ve bahçe-i mahdûd-ı merkūmların ebniye ve eşcâr ve enkāz-ı mevcûde-i mezkûrelerin mecmû‘u ırsen ve şirâen müstakıllen yedimde mülküm ve arsaları dahi dâhil-i havza-i tasarrufum olmuş iken mersûme Angero Nasrâniye menzil-i mahdûd-ı merkūmun mecmû‘ıyla arsa-i mahdûd-ı mezkûrun nısfını bi-gayr-ı hakkın fuzûlî zabt ve vaz‘-ı yed etmekle suâl olunup keff-i yedine tenbîh olunmak matlûbumdur deyü hâzıretân-ı mersûmetânın tasdîkleriyle da‘vâ etdikde, ol dahi cevâbında fi’l-hakīka menzil ve bahçe-i merkūmların ebniye ve eşcâr ve enkāz-ı mevcûde-i mezkûrların mecmû‘unu hâlik-i sânî-i mersûm Ziso zimmînin sağlığında müstakıllen yedinde mülkü ve arsaları [25a] dahi dâhil-i havza-i tasarrufu iken yedimde olup diğer bir kıt‘a arzuhâl hâmişinde mastûr iki yüz sekiz senesi şehr-i Rebî‘ülâhiri’nin yirmi yedinci günü târîhiyle müverrah Üsküdar Mahkemesi sicillâtından muhrec işbu bir kıt‘a hüccet-i şer‘iyye nâtıka olduğu üzere hâlik-i mersûm Ziso zimmî sağlığında menzil-i mahdûd-ı mezkûrun bi’l-cümle ebniyesiyle bahçe-i mahdûd-ı merkūm derûnunda mevcûde eşcâr ve enkāz-ı memlûkesinin nısfını yirmi guruş semen-i makbûza zevcim olup işbu târîhden yirmi iki sene mukaddem hâlik olan Duvarcı Nikola v. Anderya zimmîye kezâlik sağlığında bey‘ ve temlîk ve arsalarını dahi ber-minvâl-i muharrer bâ-re’y-i mütevellî meccânen ferâğ ve tefvîz ve teslîm eylediğinde ol dahi iştirâ ve temellük ve tefevvüz etdikden sonra menzil-i mahdûd-ı mezkûrun ebniyesiyle bahçe-i mahdûd-ı merkūmun eşcâr ve enkāz-ı memlûkesinin nısfını iki yüz otuz iki senesi Saferi’l-hayrın on beşinci günü üç bin beş yüz guruş semen-i medfû‘ ve makbûza bana bey‘ ve temlîk ve arsalarını dahi kezâlik bâ-re’y-i mütevellî ferâğ ve tefvîz ve teslîm eylediğinde ben dahi iştirâ ve temellük ve tefevvüz ve tesellüm ve kabûl edip ol vechile menzil-i mahdûd-ı mezkûrun ebniyesiyle bahçe-i mahdûd-ı mezbûrun eşcâr ve enkāz-ı memlûkesinin nısfı şirâen yedimde emlâkim ve arsaları dahi ber-minvâl-i muharrer dâhil-i havza-i tasarrufum olduğuna binâen bi-hakkın vaz‘-ı yed ederim deyü müdde‘î-i mersûmun inkârına mukārin eylediği def‘ini lede’t-tezkiye adl ve makbûlü’ş-şehâde idükleri ihbâr olunan karye-i mezkûre müsin ve ihtiyârlarından el-Hâc İbrahim Ağa b. Halil ve es-Seyyid Mehmed Ağa b. es-Seyyid Ahmed nâm kimesneler şehâdetleriyle tahdîd ve irâe ederek bi’l-muvâcehe vech-i şer‘î üzere isbât eylediğini kâtib-i mûmâ-ileyhimâ mahâllinde ketb ü tahrîr ve ma‘an meb‘ûs ümenâ-i şer‘le Salı günü huzûr-ı hazret-i fetvâ-penâhîde müfettiş-i mûmâ-ileyh ma‘iyyetiyle akdolunan meclis-i şer‘-i şerîfe gelip tarafeyn ve câbî-i merkūm ve şâhidân-ı mezbûrândan her biri hâzır oldukları hâlde tasdîklerine mukārin alâ-vukū‘ihî ba‘de’l-inhâ ve’t-takrîr mûcebiyle müdde‘î-i mersûm Anderya zimmî da‘vâ-yı mezkûresiyle mesfûre Angero Nasrâniyeye bî-vech-i şer‘î mu‘ârazadan ba‘de’l-men‘ menzil-i mahdûd-ı mezkûr ile nısf bahçe-i mahdûd-ı merkūmu mersûme Angero Nasrâniyenin kemâ-kân zabt ve tasarrufu iktizâ eylediği tescîl ve huzûr-ı âlîlerine i‘lâm olundu. Fî 19 B sene [1]256.