Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 154 Hüküm no: 111 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Mehmed Sadık’ın borçlularıyla alacak hususunda anlaşma sağladığı Ma‘rûz, Medîne-i Üsküdar’da Kasım Ağa mahallesi ahâlîsinden sâhib-i arzuhâl Tütüncü Mehmed Sadık b. Ebubekir Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde derûn-ı arzuhâlde mastûrü’l-ism Çoban Todori v. İstepan nâm zimmî muvâcehesinde Ustoyko v. Marko ve Nedilço v. Delo nâm zimmîler hâzır oldukları hâlde mersûm Todori zimmî zimmetinde bin iki yüz elli dört senesi Şevvâli’l-mükerremi gurresi târîhiyle müverrah bir kıt‘a temessük mantûkunca malımdan ve yedimden iktirâz ve kabz ve umûruna sarfla istihlâk eylediği bin sekiz yüz guruş ve sene-i mezkûre Zilka‘deti’ş-şerîfesinin onuncu günü târîhiyle müverrah medîne-i merkūme mahkemesinden yedime verilen bir kıt‘a i‘lâm-ı şer‘î nâtık olduğu üzere cihet-i deyn-i şer‘îden mahkûmün-bih alacağım olan bin guruş ve sene-i merkūm Muharremi’l-harâmı gurresinde medîne-i mezkûrede Kurbağalıdere nâm mahâlde vâki‘ Beylik mer‘ada ra‘y etmek için ücret-i ma‘lûme mukāvelesiyle malımdan beher re’si otuzar guruşdan mecmû‘u on dört bin dört yüz guruş kıymetli dört yüz seksen re’s ağnâmı mesfûr Todori zimmîye def‘ ü teslîm eylediğimde ol dahi ber-vech-i muharrer ahz u kabz ve bi-gayr-ı hakkın âhara bey‘le istihlâk etmekle kıymet-i mezkûreleri olup damânen hakkım olan on dört bin dört yüz guruş ki min-haysü’l-mecmû‘ on yedi bin iki yüz guruşunu mersûm Todori zimmîden ve gāib ani’l-beled Espaso v. Yako nâm zimmî zimmetinde sene-i mezkûre Muharremi’l-harâmı gurresinde malımdan ve yedimden iktirâz ve kabz ve umûruna sarfla istihlâk eylediği bâ-temessük iki bin iki yüz guruş alacak hakkıma hâzırân-ı mesfûrân İstoyko ve Nedilço zimmîden her biri iki yüz elli beş senesi Muharremi’l-harâmı gurresinde tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile bi’l-ma‘iyye kefîl ve zâminler olup hattâ târîh-i mezkûr ile müverrah yedime bir kıt‘a temessük dahi i‘tâ etmeleriyle meblağ-ı mezkûr iki bin iki yüz guruşu kefâletlerine binâen hâzırân-ı mesfûrân İstoyko ve Nedilço zimmîlerden hâlâ taleb ederim deyü da‘vâ eylediğimde mersûm Todori zimmî dahi cevâbında bana zimmetinde ancak meblağ-ı mahkûmün-bih-i mezkûr bin guruş deyni olduğunu ikrâr, lâkin ben deynim olan meblağ-ı mahkûmün-bih-i merkūm bin guruşu târîh-i i‘lâm-ı mezkûrda medîne-i mezkûre mahkemesinde sana tamâmen edâ ve teslîm etmiş idim deyü inkârıma mukārın beni def‘, mâ‘adâ ziyâde müdde‘âlarımı hâzırân-ı mesfûrân Ustoyko ve Nedilço zimmîler ile külliyen ma‘an inkâr ve ol vechile beynimizde ba‘de vukū‘i’l-münâza‘a muslihûn tavassutuyla beynimiz te’lîf olunup ben ber-vech-i meşrûh da‘vâ-yı mezkûrelerimden mersûm Todori zimmî ve hâzırân-ı mesfûrân Ustoyko ve Nedilço zimmîlerden her biri ile kat‘an li’n-nizâ‘ üçer yüz guruşdan cem‘an dokuz yüz guruş bedel-i medfû‘ ve makbûza sulh olduğumda onlar dahi sulh-ı mezkûru ba‘de’l-kabûl mâ‘adâ ziyâde müdde‘âlarıma ve bi’l-cümle husûs-ı mezkûrlara ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan ben mersûm Todori zimmî ile hâzırân-ı mersûmân Ustoyko ve Nedilço ve gāib-i asil-i mesfûr Espaso zimmîlerden her birinin zimmetlerini ibrâ-i âmm-ı sahîh-i şer‘î ile kabûllerini hâvî ibrâ ve iskāt eylediğimde mersûm Todori zimmî ile hâzırân-ı mesfûrândan her biri dahi kezâlik bi’l-cümle husûs-ı mezkûrlara ve işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan benim zimmetimi ibrâ-i âmm-ı sahîh-i şer‘î ile kabûlümü hâvî ibrâ ve iskāt eyledik deyü ikrâr ve tasâdukları huzûr-ı âlîlerine i‘lâm olundu. Fî 24 C sene [1]256.