Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 156 Hüküm no: 112 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Karafeyzizade Ali Bey’in oğlu Ali’ye vasi tayini ve nafaka tahsisi Medîne-i Üsküdar’da Gerede mahallesinde İmâm Çeşmesi karşısında sâkin iken bundan akdem vefât eden Karafeyzizâde Ali Bey’in sulbî sagīr oğlu Ali’nin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet uhdesinden gelmeğe kādire idüğü zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olan sagīr-i mezbûrun vâlidesi işbu bâ‘isetü’l-kitâb Melek Hanım bt. Abdullah’ı hâkim ( ) Efendi hazretleri sagīr-i mezbûrun vakt-i rüşd ü sedâdına tesviye-i umûruna kıbel-i şer‘den vasî nasb u ta‘yîn buyurduklarında ol dahi vesâyet-i merkūmeyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etdikden sonra vasiyy-i mezbûre Melek Hanım talebiyle hâkim-i müşârün-ileyh Efendi hazretleri sagīr-i mezbûre malı nemâsından işbu târîh-i kitâbdan kadr-ı ma‘rûf idüğü ihbâr olunan beher şehr iki yüz guruş nafaka ve kisve-bahâ farz ve takdîr buyurup meblağ-ı mefrûz-ı mezkûr beher şehr iki yüz guruşu sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve vakt-i hâcetde istidâneye ve lede’z-zafer sagīr-i mezbûrun malı nemâsına rücû‘a vâlidesi vasiyy-i mezbûre Melek Hanım’a izin vermeğin mâ-vaka‘a bi’t-taleb ketb olundu. Fî-gurreti S sene [1]256. Şuhûdü’l-hâl: es-Seyyid el-Hâc Mustafa Efendi, Tüccârdan Ali Ağa b. Ömer, es-Seyyid Abdülhalim Ağa b. el-Hâc Hüseyin tâbi‘-i muhzır.