Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 304 Hüküm no: 636 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal b. Nikola’nın Gülfam Hatun Vakfı’ndan bey‘ bi’l-istiğlâl yoluyla ödünç aldığı Sebeb-i tahrîr-i kitâb oldur ki Havâss-ı Kostantınıyye’ye tâbi‘ Kuruçeşme’de sâkin Mihal b. Nikola meclis-i şer‘-i şerîfe gelip şöyle ikrâr ve i‘tirâf eyledi ki karye-i mezbûrede vâki‘ olan mülk menzilimi iki tahtânî evi ile ve su kuyusu ile ve hadîkası ile ve eşcâr-ı müsmiresi ve gayr-ı müsmiresi ile hudûdu bir tarafı tarîk-i âm ile bir tarafı Lorenci nâm Frenk mülkü ile ve bir tarafı Simo b. Yani mülkü ile ve bir tarafı arz-ı hâliye ile mahdûd mülkümü işbu sâhibetü’l-hüccet Gülfam Hatun vakıf akçesine câbî olan Hâcı Hüseyin b. Abdullah[‘a] dört bin vakıf akçeye bey‘ eyledim hâliyâ teslîm-i mebî‘ ve kabz-ı semen olup ba‘de’t-tahliye ve’l-kabz Cemâziyelevvel’in gurresinden sene 968 Recebi’ne varınca beş yüz akçe icâreye geri kabûl eyledik deyip mukırr-ı mezbûrun ikrârını mukarrun lehü’l-merkūm vakfın câbîsi Hâcı Hüseyin bi’l-müvâcehe ve’l-müşâfehe tasdîk edip ve zarara (…) kefîl taleb olucak Simo b. Yani, Role b. Marko ve İstemat b. Yani kefîl olup mezbûrûnun kefâlet[lerini] merkūm Hâcı Hüseyin meclis-i şer‘de kabûl edip mâ-hüve’l-vâkı‘ bi’t-taleb kayd-ı sicil olundu. Tahrîren fî evâhiri Recebi’l-mürecceb li-sene 968. Erbi‘â gününden. Şuhûdu’l-hâl: Hasan b. Abdullah, Mehmed b. Ali ve Veli b. Mustafa ve Ferruh b. Abdullah ve Mehmed b. Veli dellâk, Yani b. Dimitri ve gayruhüm.