Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 304 Hüküm no: 637 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öldürülen Yahudilerle ilgili yapılan soruşturmada babalarının adlarını doğru söylemekten imtina eden Hüsam Reis ve kardeşi İbrahim’in alınan ifadeleri Vech-i tahrîr-i hurûf oldur ki Havâss-ı Kostantınıyye’ye tâbi‘ Kuruçeşme nâm karyede Hüsam Reis çardağında katl olan Yahudâların teftîş için Mübâşir Mehmed Çavuş ile görüldükde mezbûr Hüsam Reis ile karındaşı İbrahim bile meclis-i şer‘-i şerîfe getirilip suâl oluncak takrîrleri tahrîr olmak için mezbûr Hüsam Reis’e babası adı suâl oluncak Mustafa’dır deyu cevâb verip ve mezbûr İbrahim dahi Mustafa deyu cevâb verip yarındası gün geri meclis olup takrîrleri yazılmak lâzım geldikde babaları adı suâl oluncak mezbûr İbrahim Yusuf’dur deyu cevâb verip mezbûr Hüsam Reis’e defa suâlde babam adı Yusuf’dur deyu cevâb verip defa suâlda babamız adını bilmeziz dedemiz adı Hızır’dır dediler mezbûrânın tenâkuzları sâhib-i dem talebi ile li-ecli’l-arz kayd olundu. Tahrîren fî evâhiri Cemâziyelâhir li-sene semân ve sittîn ve tis‘a mi’e. Şuhûdü’l-hâl: Mehmed b. Mustafa ve Ferruh b. Abdullah ve Naima Bey b. Abdullah ve gayruhüm. Ba‘dehû Mezbûr Hüsam Reis’den suâl olunup Yahudiler katl olunduğu gecesin kande yatdın deyicek Kaya Çelebi evinde yatdım deyu cevâb verip ve Kaya Çelebi’den suâl olundukda mezbûr Hüsam Reis ahşam vaktinde bizim ile ta‘âmlanıp ve yatsı namâzın bizim ile bilece kılıp ba‘dehû ben evim içine yatmağa gitdim mezbûr Hüsam Reis taşra selâmlıkda kaldı sabâh namâzında yine hâzır idi bilmezim gece gitdi mi gitmedi mi deyu cevâb verip, Ba‘dehû Mezbûr Hüsam Reis’in karındaşı İbrahim’den suâl olunup sen Yahudiler katl olunduğu geceden evvel vakt-i asr karındaşın Hüsam Reis ile mezbûr Hüsam Reis’in Yahudilerin sâkin olduğu evine bilece varmışsın deyicek inkâr ile cevâb verip Cerbe seferinden geleliden dahi ben ol eve varmadım demiş idi sonra karındaşı Hüsam Reis bilece vardık deyu ikrâr edicek mezbûr İbrahim dahi karındaşı tasdîk edip bilece vardım deyu ikrâr etdi ya niçin evvelâ inkâr etdin sonra ikrâr etdin deyicek sonra ikrâr etdim ammâ örf etdiler işkence ile ikrâr etdim dedi. Ba‘dehû Mezbûr İbrahim şöylece haber verdi ki karındaşım Hüsam Reis ve Hamza Reis kimesneden yelkenci ve gömi âletcileri ve iki kimesne dahi bilece nısfe’l-leylde gelip Yahudileri kırdılar dedi bu takrîrinde sâdık mısın deyu suâl olundukda bana işkence etdiler onun içün böyle dedim deyu cevâb verdi. Ba‘dehû Mezbûr İbrahim ikrâr edip zikr olan yahudiler öldü içinde katl olundukları gece ben ol evin deryâdan cânibinde olan kapısı yanında durdum karındaşım Hüsam Reis ve bir Arab ve Hamza Reis ve gömi ve yelkenci ve bi’l-cümle ol gece beş altı nefer kimesne bilece idik deyicek bu ikrârında sâdık mısın deyu suâl olundukda işkence ile ikrâr etdim deyu cevâb verdi. Tahrîren fi’t-târihi’l-mezbûr.