Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 47 Hüküm no: 3 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Abdülvehhab’ın evini ve bazı eşyalarını kocası Bayram Bey b. Oruc’a hibe ettiği Mahmiye-i Galata’ya tâbi‘ kasaba-i Beşiktaş mahallâtından Sinan Paşa-yı Cedîd mahallesi sâkinelerinden Rahime bt. Abdülvehhâb nâm Hatun meclis-i şer‘-i hatîr-i lâzımü’t-tevkīrde işbu râfi‘ü’l-kitâb zevci fahrü’l-akrân Bayram Bey b. Oruc nâm kimesne muvâcehesinde bi-tav‘ihâ ikrâr ve takrîr-i kelâm edüp mahalle-i mezbûrede vâki‘ bir tarafı Hüseyin Ağa mülkü ve bir tarafı Değirmenci el-Hâc ( ) mülkü ve bir tarafı Fâtıma Hatun mülkü ve bir tarafı tarîk-i âm ile mahdûd iki bâb tahtânî odayı ve bir sofayı ve fırın ve bir bi’r-i mâ’yı ve kenîfi ve zât-ı eşcâr-ı müsmire ve gayr-i müsmireyi müştemil mülk menzilimi ba‘de’t-tahliyeti’ş-şer‘iyye ve yine silk-i mülkümde münselik iki beledî döşek ve dört münakkaş yastık ve iki yemeni yorgan ve iki sahan, iki tencere ve bir siniyi dahi zevcim mezbûr Bayram Bey’e hibe-i sahîha-i şer‘iyye ile hibe ve temlîk ve teslîm ol dahi meclis-i hibede ittihâb ve temellük ve tesellüm eyledi ba‘de’l-yevm menzil-i mezkûr ve eşyâ-yı mersûm merkūm Bayram Bey’in mülk-i mevhûbudur kat‘â benim alâkam kalmadı dedikde mukırre-i mezbûre Rahime Hatun’un ikrâr-ı meşrûhasını merkūm Bayram Bey vicâhen tasdîk etmeğin mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilka‘deti’ş-şerîfe li-sene ihdâ ve sittîn ve elf. Şühûdü’l-hâl: Abdülkerim Efendi el-İmâm, Abbas Bey b. İbrahim Bey, Bâli Bey b. Abdülmennan, Mustafa Çelebi b. Şaban Ağa, Ebûbekir Çelebi b. Ebûbekir, Ali Beşe b. Abdullah, Mehmed Çelebi b. Şaban, Ali Bey b. Mustafa, Ahmed Çelebi b. Şaban, Zülfikār Beşe b. Mehmed, Mustafa Beşe b. Mehmed, Mehmed Beşe b. Ramazan, Mehmed Çelebi b. Mahmud ve gayruhüm.