Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 51 Hüküm no: 9 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Şaban Bey’in, para ve gemisini ticaret için verdiği Gemici Ahmed b. Hasan’ın gemiyi batırdığını tescil ettirdiği Mahmiye-i Galata muzâfâtından kasaba-i Beşiktaş’da sâkin Mustafa Beşe b. Şaban Bey mahfil-i kazâda gemici tâifesinden Ahmed b. Hasan nâm kimesne muvâcehesinde üzerine da‘vâ ve takrîr-i kelâm edüp bundan akdem sermâye tarîkiyle merkūm Ahmed’e iki bin yüz akçe verip iki bin akçe kıymetli bir köhne odun kayığımı dahi kendi talebiyle kendüye def‘ u teslîm eyleyüp Karadeniz’e sefer etmeğe teveccüh eyledikde zinhâr Bartın İskelesi’ne varma her kangı iskeleye varırsan var Bartın’a varma mahal tehlikelidir gemiyi iğrâk edüp sermâyemi zâyi‘ edersin deyü tenbîh etmiş iken merkūm Ahmed eslemeyip an kasdin Bartın’a varup ihlâk edüp te’addî etmişdir dedikde gıbbe’s-suâl mezbûr Ahmed hakīkat-i hâl vech-i muharrer üzere olduğunu münkir olıcak mersûm Mustafa Beşe’den takrîrine mutâbık beyyine taleb olundukda Mustafa b. Mehmed ve Ahmed b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka [3b] minvâl-i muharrer üzere merkūm Mustafa Beşe mersûm Ahmed’e elbette Bartın İskelesi’ne varma muhâtaralı mahaldir deyü tenbîh ettiği bizim ma‘lûmumuzdur biz bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe ri‘âyet şerâiti’l-kabûl şehâdetleri hayyiz-i kabûlde vâkı‘a olmağın mûcebiyle hüküm birle işbu hurûf ketb olundu. Fî-gurre-i Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Sefer Beşe b. Mehmed, Mehmed Reis b. Ahmed, Hüseyin Beşe b. Mehmed ve gayruhüm.