Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 52 Hüküm no: 11 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoşnevâ Hatun bt. Abdullah’ın, Negir v. Yorgi’de alacağı olduğunu ispat ettiği Husûs-ı âti’l-beyânı mahallinde ketb u terkīm için kıbel-i şer‘-i kavîmden âdem taleb olundukda küttâb-ı mahkemeden fahrü’l-kuzât Mevlânâ Abdurrahman Efendi irsâl olunup ol dahi zeyl-i kitâbda mastûrü’l-esâmî olan Müslimîn ile kasaba-i Beşiktaş’da Arab İskelesi’nde sâkin Yahya Beşe’nin menziline varup akd-i meclis-i şer‘ eyledikde merkūm Yahya’nın zevcesi işbu hâfızatü’l-kitâb Hoşnevâ Hatun bt. Abdullah meclis-i mezbûrda Arnavud nâm karyede sâkin Hallâcoğlu demekle ma‘rûf Negir? v. Yorgi nâm zimmî muvâcehesinde üzerine da‘vâ ve takrîr-i kelâm edüp [4a] zimmî-i mezbûr zimmetinde cihet-i karz-ı şer‘îden vâcibü’l-edâ ve lâzımü’l-kazâ fıddî râyic fi’l-vakt on dört bin akçe hakkım olduğunu huzûr-ı Müslimînde kirâren ve mirâren ikrâr u i‘tirâf etmiş iken vermekde muhâlefet ve nizâ‘ eder suâl olunup takrîri tahrîr ve ihkāk-ı hak olunması matlûbumdur deyicek gıbbe’s-suâl ve akībe’l-inkâr kasaba-i mezbûre sükkânından ve udûl-i Müslimînden Mehmed Beşe b. Ebûbekir er-râcil ve Ali Efendi b. Ahmed el-Müderris ve Kurd Çelebi b. Hayreddin nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka hâl minvâl-i muharrer üzeredir zimmî-i mezbûr müdde‘iye-i mezbûreden karz-ı şer‘îden vâcibü’l-edâ ve on dört bin akçe deynim vardır deyü kirâren ve mirâren ikrâr u i‘tirâf etmişdir biz bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra mûcebiyle [hükm?] aldıktan sonra mevlânâ-yı mezbûr hakīkat-i hâli mahallinde ketb u terkīm edüp ba‘dehû gelip meclis-i şer‘de alâ-vukū‘ihî ihbâr etmeğin ihbârı makbûle olmağın mâ-hüve’l-vâkı‘ bi’t-taleb ketb u terkīm olunup yedine def‘ u teslîm olundu ki vakt-i hâcetde kıyâs-ı mâ-cerâ ola. Tahrîren fî-evâili Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Fahrü’l-akrân Mustafa Usta b. Abdullah, Mehmed Çelebi b. Şaban Bey, Mustafa Çelebi b. Mehmed, Mustafa Beşe b. Mehmed, el-Hâc Mahmudzâde İbrahim Çelebi, Ali Beşe b. Süleyman Serdâr ve gayruhüm.