Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 53 Hüküm no: 12 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Süleyman Han mahallesinden Müslime bt. Ali’nin vefat eden kocası Bayram b. Şaban’da olan mehrine karşılık muhallefattan bir evin kendisine verildiği Mahmiye-i Galata’ya tâbi‘ kasaba-i Beşiktaş mahallâtından merhûm Sultân Süleyman Hân mahallesi sâkinlerinden iken bundan akdem vefât eyleyen Bayram b. Şaban nâm müteveffânın muhallefâtı rub‘u işbu râfi‘atü’l-kitâb zevce-i metrûkesi Müslime bt. Ali nâm hatuna ve selâse-i erbâ‘ı kasaba-i mezbûrede beytülmâl emîni olan Ali Bey b. Mustafa nâm kimesneye âid ve râci‘ olmağın mezbûre Müslime Hatun meclis-i şer‘-i hatîr-i lâzımü’t-tevkīrde merkūm Ali Bey muvâcehesinde üzerine da‘vâ ve takrîr-i kelâm edüp müteveffâ-yı mezbûr Bayram’ın zimmetinde mütekarrer olan iki bin akçe mehr-i müeccel hakkımı müteveffâ-yı merkūmun muhallefâtından alıverilmesin taleb ederim dedikde gıbbe’s-suâl ve akībe’l-inkâr müdde‘iye-i mezbûre Müslime Hâtûn’dan da‘vâsına mutâbık beyyine taleb olundukda mahalle-i mezbûre sâkinlerinden Nasûh Efendi b. Mustafa el-İmâm ve Mustafa Ağa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Bayram’ın zimmetinde zevcesi mezbûre Müslime Hatun’un iki bin akçe mehr-i müeccel hakkı vardır biz bu husûsa bu minvâl üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti [4b] şerâiti’l-kabûl şehâdetleri hayyiz-i kabûlde vâki‘ oldukdan sonra gıbbe’t-tahlîfi’ş-şer‘î ve mezbûr Ali Bey meclis-i mezbûrda merkūme Müslime Hatun muvâcehesinde ikrâr u i‘tirâf edüp müteveffâ-yı merkūmun muhallefâtından olup mahalle-i mezbûrede vâki‘ ma‘lûmü’l-hudûd bir bâb tahtânî odayı ve havliyi müştemil mülk menzili merkūme Müslime Hatun’a iki bin râyic fi’l-vakt akçeye tarafeynden îcâb ve kabûlü hâvî bey‘-i bât ile bey‘ ve teslîm ol dahi vech-i muharrer üzere iştirâ ve tesellüm eyledikden sonra semeni olan meblağ-ı mezkûr iki bin akçeyi müteveffâ-yı mersûmun zimmetinde olan merkūme Müslime Hatun’un iki bin akçe mehr-i müeccel hakkına takās eyleyüp ba‘de’l-yevm menzil-i mezkûr-ı mezbûre Müslime Hatun’un mülk-i müşterâsıdır keyfe mâ teşâ ve tehtâr mutasarrıfe olsun dedikde mukırr-ı mezbûr Ali Bey’in cârî ve sâdır olan kelâmını mezbûre Müslime Hatun vicâhen tasdîk ve şifâhen tahkīk eylemeğin mâ-vaka‘a bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Umdetü ashâbi’l-kirâm Hasan Efendi b. Hüseyin, Murtaza Beşe b. Abdullah, Mehmed Beşe b. Ali, Cafer Beşe b. Mehmed, Muslu b. Mehmed, Bâli Dede b. Receb, Bayram Dede b. Pîrî, Himmet Beşe b. Mahmud, Mustafa b. Mehmed ve gayruhüm.