Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 57 Hüküm no: 18 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Dede’nin Üçüncü Sekbanlar Bölüğü’ne vakfettiği evin Mehmed Çelebi b. Hasan’a satıldığı Üçüncü Sekbânlar bölüğünde odabaşı olan fahrü’l-akrân Mehmed Odabaşı kendi tarafından asâleten ve ahâlî-i oda-i mezbûre taraflarından dahi husûs-ı âti’l-beyâna vekîl olup nehc-i mu‘teber-i şer‘î üzere vekâleti sâbite olan Mehmed Odabaşı b. Halil mahfil-i kazâda işbu hâfızü’l-kitâb Mehmed Çelebi b. Hasan muvâcehesinde ikrâr ve takrîr-i kelâm edüp mahmiye-i Galata muzâfâtından kasaba-i Beşiktaş’da vâki‘ merhûm Sinanpaşa mahallesinde vâki‘ lede’l-ahâlî ve’l-cîrân ma‘lûmü’l-hudûd fevkānî üç bâb odayı ve bir sofa ve muhavvata ve bi’r-i mâyı müştemil olan mülk menzili mukaddemâ Hasan Dede nâm kimesne oda-i mezbûreye şart ve ta‘yîn eyleyüp lâkin harâba müşrif olmağla menzil-i mezbûr fürûht olunup semeni istirbâh olunmak evlâ ve ahrâ olmağla gıbbe’l-izni’ş-şer‘î menzil-i merkūm müzâyede olunup rağabât-ı nâs münkatı‘a [6a] oldukdan sonra merkūm Mehmed Çelebi üzerinde yirmi bir bin akçede karâr edüp ziyâde ile âhar tâlibi olmamağın zeyl-i kitâbda mastûrü’l-esâmî ahâlî-i mezbûre ittifâkıyla merkūm Mehmed Çelebi’ye meblağ-ı mezbûr yirmi bir bin akçeye bey‘-i bâtt-ı kat‘î ile bey‘ ve teslîm edüp ol dahi iştirâ ve tesellüm ve kabz eylediğinde semeni olan meblağ-ı mezbûru yedinden bi’t-tamâm ve’l-kemâl ahz u kabz eyledim ba‘de’l-yevm mülk-i müşterâsıdır keyfe mâ yeşâ ve yehtâr mutasarrıf olsun deyicek gıbbe’t-tasdîki’ş-şer‘î vicâhen mâ-hüve’l-vâkı‘ bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Mustafa Beşe b. Mehmed, İbrahim Beşe b. Ahmed, Ebûbekir Beşe b. Ahmed, Ali Beşe b. Şaban, Hüseyin Beşe b. İsmail, Osman Beşe b. Ali, Mustafa Beşe b. Receb ve gayruhüm. * Bu sûret onuncu kağıddan gayrı yüzden yazılmışdır gaflet olunmaya. Sahh, sahh, sahh, sahh, sahh.