Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 58 Hüküm no: 19 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kozana bt. Abdullah’ın kocası Ahmed b. Mustafa’nın muhallefat hissesine karşılık bir ev aldığı Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinelerinden iken bundan akdem müteveffât olan Kozana bt. Abdullah nâm saraylının muhallefâtının nısfı zevc-i metrûkü Ahmed b. Mustafa nâm kimesneye ve nısf-ı âharı beytülmâl emîni olup Saray-ı atîk’de hâlâ kızlar ağası olan iftihârü’l-havâs ve’l-mukarrebîn mu‘temedü’l-mülûk ve’s-selâtîn Bayram Ağa’ya münhasıra olduğu şer‘an zâhir ve müte‘ayyen oldukdan sonra mezbûr Ahmed mahfil-i şer‘-i kavîm-i vâcibü’t-tekrîmde müşârun ileyh Bayram Ağa kıbelinden husûs-ı âti’l-beyânı tasdîka nehc-i şer‘î üzere vekîl olan mefharü’l-akrân Mustafa Bey b. Bâli nâm bevvâb-ı sultânî muvâcehesinde ikrâr ve takrîr-i kelâm edüp müteveffât-ı mezbûrenin muhallefâtı bey‘ olunması lâzım olmağın beynimizde müzâyede oldukda muhallefât-ı mezbûre cem‘an otuz dört bin akçe zuhûr eylemeğin meblağ-ı mezbûrun nısfı ki on yedi bin akçe hisse-i şer‘iyyem mukābelesinde muhallefât-ı mezbûreden olup mahalle-i mezbûrede vâki‘ ma‘lûmü’l-hudûd iki bâb tahtânî odayı ve kenîf ve zât-ı eşcâr-ı müsmire ve gayr-i müsmireyi müştemil menzili hisse-i şer‘iyyem olan meblağ-ı mezkûr on yedi bin akçe mukābelesinde menzil-i mezkûru vekîl-i mezbûr Mustafa Ağa yedinden ahz u kabz eyleyüp muhallefât-ı mezbûra müte‘allik mezbûr Mustafa Ağa’nın zimmetini ibrâ-i âmm-ı kātı‘ü’n-nizâ‘ ile ibrâ ve iskāt-ı hak eyledim dedikde mukırr-ı merkūm Ahmed’in cârî olan kelâmını tasdîk eylemeğin kayd şüd. Tahrîren fi’l-yevmi’t-tâsi‘ aşer min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Ahmed Efendi b. Ömer Efendi, Mustafa Efendi b. İbrahim el-İmâm, el-Hâc Yusuf b. Abdullah, Mustafa Bey b. Ahmed bevvâb-ı sultânî, Mahmud Çelebi b. Mehmed, Nasûh Çelebi b. Musa, Mehmed Çelebi b. Ebûbekir, Ahmed Çelebi b. Ali, Yahya Çelebi b. Nasûh, Mehmed Çelebi b. Şaban.