Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 59 Hüküm no: 20 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hızır’ın evini Receb Bey b. Şaban ile hanımı Saliha Hatun bt. Abdullah’a sattığı Mahmiye-i Galata muzâfâtından kasaba-i Beşiktaş’da Kılıçalipaşa mahallesinde sâkin Mahmud Çelebi b. Mehmed nâm bevvâb-ı sultânînin mahalle-i mezbûrede sâkine fahrü’l-muhadderât Âişe Hatun bt. Hızır tarafından bey‘-i âti’l-beyâna vekîl olup Eşref Efendi b. Pîrî ve Bayram Ağa b. Abdullah şehâdetleriyle şer‘an vekâleti sâbite oldukdan sonra vekâleten mahfil-i kazâda işbu hâfızü’l-kitâb Receb Bey b. Şaban muvâcehesinde kendi tarafından asâleten ve zevcesi Saliha Hatun bt. Abdullah tarafından dahi menzil-i âti’l-beyânın nısfını iştirâya vekîl olup mezbûre Saliha’yı ma‘rifet-i şer‘iyye ile ârifân olan Bayram Ağa b. Abdullah ve Ahmed Çelebi b. Cafer şehâdetleriyle vekâleti sâbite oldukdan sonra vekâleten ikrâr-ı tâm ve takrîr-i kelâm edüp müvekkilem merkūme Âişe’nin ceddi Süleyman Bey’e intimâ ile tahdîd ve tavsîfden müstağnî etrâf-ı erba‘ası vakf-ı mezbûr ile mahdûd fevkānî bir bâb oda ve bir sofa ve tahtânî iki oda ve bi’r-i mâ ve kenîfi müştemil vakf-ı mezbûr arsası üzerinde vâki‘ mülk menzilini cümle tevâbi‘ ve levâhıkı ile müvekkilem merkūme mezbûr Receb Bey ile zevcesi merkūme Saliha’ya ale’l-iştirâki’s-seviy yetmiş beşer riyâlî guruş ki cem‘an tâmmü’l-vezn yüz elli riyâlî guruşa bey‘ ve teslîm edüp onlar dahi vech-i muharrer üzere iştirâ ve kabûl ve kabz eylediklerinden sonra yetmiş beşer mezbûrü’l-vezn guruşu yedlerinden bi’t-tamâm ahz u kabz eyledi ba‘de’l-yevm mülk-i müşterâlarıdır keyfe mâ yeşâ ve yehtâr mutasarrıf olsunlar vechen mine’l-vücûh âhar kimesnenin menzil-i merkūmda alâka ve medhali yokdur deyicek vekîl-i merkūm Mahmud Çelebi’yi ikrâr-ı meşrûhunda müşterî-i mersûm Receb Bey bi’l-müvâcehe asâleten ve vekâleten tasdîk edicek sıhhat-i bey‘ u şirâya hüküm birle bu hurûf ketb olundu. Fi’l-yevmi’l-ışrîn min-Zilhicce li-sene ihdâ ve sittîn ve elf. Şühûdü’l-hâl: Umdetü’l-emâcid ve’l-ekârim Seyyid Mustafa Paşa, fahrü’l-akrân Abbas Bey, Ali Beşe b. İbrahim, Yahya Çelebi b. Perviz, Veli Beşe b. Hasan, Usta Ömer, Şeyh Ahmed ve gayruhüm.