Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 64 Hüküm no: 27 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersane-i âmire Kethudâsı Ali Kethüdâ b. Bayram’ın para vakfı Fâtiha-i makāl ve matla‘-ı emr-i zî-bâl hamd-i hudâ-yı müte‘âl ile takdîm ve seyyidü’l-enâm aleyhi efdalü’t-tahiyye ve’t-teslîm Ebu’l-Kasım Muhammed Mustafa sallallâhu aleyhi ve sellem hazretlerine ve âl ü ashâbına salât ü selâm ile ta‘zîm olundukdan sonra işbu kitâb-ı sıhhat-nisâbın tahrîr ve inşâsına bâ‘is ü bâdî budur ki mahmiye-i Galata muzâfâtından kasaba-i Beşiktaş mahallâtından Sinan Paşa-yı Cedîd mahallesinde sâkin olup Tersâne-i âmire kethüdâsı iken merhûm olan işbu sâhibü’l-hayrât ve’l-hasenât Ali Kethüdâ b. Bayram’ın sülüs malından tenfîz-i vesâyâ-yı şer‘iyyesine vasiyy-i muhtâr nasb u ta‘yîn eylediği sâbit olan zevce-i metrûkeleri fahrü’l-muhadderât Belkıs Hatun bt. Abdülmennan’ın tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Mustafa Çelebi b. Şaban Ağa ve Ali Efendi b. Yusuf nâm kimesneler şehâdetleri ile şer‘an vekâleti sâbite olan Enver Efendi b. Salih nâm kimesne mahfil-i şer‘-i kavîm-i vâcibü’t-tekrîmde li-ecli’t-tescîl ve li-emri’t-tetmîm ve’t-tekmîl mütevellî nasb u ta‘yîn eylediği mefharü’l-hutebâ Eşref Efendi b. Veli nâm kimesne muvâcehesinde bi’l-vekâle ikrâr-ı tâm ve takrîr-i kelâm edüp müvekkilem müşârun ileyhâ ber-mûceb-i vasiyyet-i şer‘iyye merhûm-ı mezbûrun sülüs malından on dokuz bin akçe ifrâz ve kemâl-i imtiyâz ile mümtâz kılup vakf-ı sahîh-i şer‘î ve habs-i sarîh-i mer‘î ile vakf ve habs edüp mütevellî-i mezbûra teslîm ol dahi vech-i muharrer üzere tesellüm edüp sâir evkāf mütevellîleri gibi <> tasarruf eylediğinden sonra şöyle şart ve ta‘yîn eylemişdir kim meblağ-ı mezkûru bütün ribâdan hâlî ve zîver-i devr-i şer‘î ile hâli-vech üzere mu‘âmele ile zimem-i nâsa verilip onu on bir buçuk akçe hesâbı üzere mu‘âmele edüp rehn-i kavî ve kefîl-i melîsin almayınca kimesneye akçe verilmeye bi-fazlillâhi te‘âlâ meblağ-ı mârrü’z-zikr on dokuz bin akçenin beş bin akçesinden hâsıl olan ribh u nemâsını kasaba-i mezbûrede vâki‘ merhûm Kılıç Ali Paşa Sarayı’nda vâki‘ mescid-i şerîfinde imâm olan merkūm Eşref mescid-i mezbûrda merkūm Ali Kethüdâ’nın rûhi’çün beher yevm birer cüz’-i Kur’ân-ı şerîf tilâvet ve kırâ’et eyleyüp sevâbın mezbûr Ali Kethüdâ’nın rûhuna hibe eyleyüp yevmî iki akçe vazîfeye mutasarrıf ola ve meblağ-ı mezkûrun iki bin akçesinden hâsıl olan ribhi mahalle-i mezbûrede vâki‘ merhûm Sinanpaşa Mescidi’nin lâzım olan meremmâtına harc u sarf oluna ve beş bin akçesinden hâsıl olan ribhi mahalle-i mezbûre avârızına imdâd oluna ve iki bin akçesinden hâsıl olan ribhi mahalle-i mezbûrede vâki‘ merhûm Receb Kethüdâ’nın vakf çeşmesinin lâzım olan meremmâtına harc u sarf oluna ve meblağ-ı mezkûrun beş bin akçesinden hâsıl olan ribhi merkūm Eşref Efendi mütevellî olup yevmî iki akçe vazîfeye mutasarrıf ola ba‘de vefâtihî re’y-i hâkim ile mahalle-i mezbûreden bir sâlih kimesne mütevellî olup vazîfe-i mezbûreye mutasarrıf ola ve ahâlî-i mahalle hasbî nâzır olalar deyü şart ve ta‘yîn eyledikde vekîl-i mezbûr Enver Efendi’nin [9b] vech-i muharrer üzere cârî ve sâdır olan ikrârını mütevellî-i mersûm Eşref Efendi bi’l-müvâcehe tasdîk ve bi’l-müşâfehe tahkīk ettikden sonra vekîl-i merkūm i‘âde-i kelâm edüp hazret-i imâm-ı efham ve hümâm-ı ekrem Ebû Hanîfe-i Kûfî cûziye bi’l-hayr ve kûfî katında vakf-ı nukūdun adem-i lüzûmu muhakkak olmağın vekîl-i mersûm vakf-ı mezbûrdan rücû‘ edüp istirdâda şürû‘ ettikde mütevellî-i mezbûr dahi bi’l-müvâcehe cevâb verip vakf-ı nukūd husûsan ba‘de’t-teslîm ile’l-mütevellî İmâm Züfer aleyhi’r-rahmetü’l-Meliki’l-Kerîm katında sahîh lâzımdır binâen alâ-zâlik vakf-ı merkūmun sıhhat ve lüzûmuna hükm taleb ederim dedikde hâkim-i muvakki‘-i kitâb ûtiye kitâbuhu bi-yemînihî yevme’l-hesâb bu husûsda nazar-ı enîk ve teemmül-i hakīk ile nazar ve teemmül edüp cânib-i mütevellîde rüchân-ı kavî gördüyse vakf-ı mersûmun zımnında olan şurûtun sıhhat ve lüzûmuna hükm edüp vakf-ı mezbûr müseccel ve müsebbel ve muhalled ve müebbed oldu. “Fe-men beddelehû ba‘de mâ semi‘ahû fe-innemâ ismühû ale’llezîne yübeddilûnehû innallâhe semî‘un alîm” ve ecrü’l-vâkıfı ale’l-hayyi’l-kerîm ve alâ hâzâ vak‘a’l-işhâd ve’t-tahrîr. Fî-gurre-i min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Fahrü’l-akrân Abbas Bey b. İbrahim Bey, Bayram Ağa b. Abdülmennan, diğer Bayram Ağa b. Abdullah, Abdülkerim Çelebi b. Muhsin el-İmâm, Ali Çelebi b. Cafer el-Müezzin, Cafer Bey b. Ahmed, Mehmed Bey b. Mahmud, Ebûbekir Çelebi b. Ebûbekir, Durmuş Kapudan b. Yahya, Zülfikār Bey b. Abdullah, Ahmed Efendi el-Kâtib, Mustafa b. Mehmed Muhzır, Cafer b. mezbûr Muhzır, Mehmed Çelebi b. Mahmud ve gayruhüm mine’l-huzzâr.