Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 65 Hüküm no: 28 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Kethüdâ b. Bayram’ın nukud vakfının mütevellisi Eşref Efendi b. Veli’nin tevliyyeti Ali Kethüdâ’nın hanımı Belkıs Hatun bt. Abdülmennan’a devrettiği Mahmiye-i Galata’ya tâbi‘ kasaba-i Beşiktaş mahallâtından Sinan Paşa-yı Cedîd mahallesinde sâkin iken bundan akdem vefât eden Ali Kethüdâ b. Bayram nâm müteveffânın vakf eylediği on dokuz bin nakd akçenin mütevellîsi olan fahrü’l-hutebâ Eşref Efendi b. Veli nâm kimesne <> mahfil-i kazâda mahalle-i mezbûre sâkinelerinden olup vâkıf-ı mezbûr Ali Kethüdâ’nın zevce-i metrûkeleri işbu sâhibetü’l-kitâb fahrü’l-muhadderât Belkıs Hatun bt. Abdülmennan’ın tarafından husûs-ı âti’z-zikri tasdîka vekîl olup mezbûreyi ma‘rifet-i şer‘iyye ile ârifân olan Ali Efendi b. Yusuf ve Mustafa Çelebi b. Şaban Ağa nâm kimesneler şehâdetleri ile şer‘an vekâleti sâbite olan Enver Efendi b. Salih nâm kimesne muvâcehesinde ikrâr-ı tâm ve takrîr-i kelâm edüp vâkıf-ı mezbûr Ali Kethüdâ’nın vakf eylediği meblağ-ı mezkûr on dokuz bin akçenin yevmî iki akçe vazîfeyle mutasarrıf olduğum tevliyyeti kendi hüsn-i irâdetim ile mezbûre Belkıs Hatun’a ferâğ edüp tevliyet-i mezbûreye mutasarrıfe olsun dedikde vekîl-i mezbûr dahi tevliyet-i mersûmu müvekkile-i mezbûre Belkıs Hatun tarafından kabûl ve mukırr-ı mezbûr Eşref Efendi’nin cârî ve sâdır olan ikrârını bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fî-gurreti min-Muharremi’l-harâm li-sene isnâ ve sittîn ve elf. Şühûdü’l-hâl: Şuhûdü’s-sâbıkūn.