Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 66 Hüküm no: 29 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Efendi’nin vakıf emlakinin bitişiğindeki boş arsanın Kostantin v. Karaca’ya babasından irsen intikal ettiğinin tescil edildiği Husûs-ı âti’l-beyânın mahallinde tahrîri <> iltimâs olunmağın hâkim-i muvakki‘-i kitâb tûbâ-lehû ve hüsnü-meâb dahi mahmiye-i Galata kazâsına tâbi‘ kasaba-i Beşiktaş’da vâki‘ merhûm ve mağfûrun-leh Yahya Efendi’nin evlâd u evlâdına vakfı olup lede’l-ahâlî tahdîd ve tavsîfden müstağnî tarlalar ve arsa-i hâliyesine varup akd-i meclis-i şer‘-i şerîf eyledikde merhûm Yahya Efendi evlâdı evlâdından olup hâlâ zikr olunan tarlaları ve arsa-i hâliyeye mutasarrıf olan fahrü’l-muhadderât [10a] Hadice Hatun bt. Mustafa Efendi tarafından husûs-ı âti’l-beyânı ikrâra nehc-i şer‘î üzere vekîl olan zevci aynü’l-a‘yân Haydar Ağa b. Yahya nâm kimesne meclis-i mezbûrda câr-ı mülâsıkı olan işbu râfi‘ü’s-sifr Kostantin v. Karaca nâm zimmî muvâcehesinde ikrâr ve takrîr-i kelâm edüp merhûm Yahya Efendi’nin vakf arsa-i hâliyesi kurbünde vâki‘ bir tarafı vakf-ı mezkûr arsa-i hâliye ve bir tarafı Arslan nâm Yahudi bağı ve bir tarafı Todori nâm zimmî bağı ve bir tarafı vâdi ile mahdûd olan bağ ve <> ve arsa-i hâliye mezbûr Kostantin’e babası Karaca nâm zimmîden irsen intikāl edüp mülk-i mevrûsudur deyü ihbâr ve zeyl-i kitâbda mastûrü’l-esâmî olan Müslimânlar dahi vech-i muharrer üzere haber verdiklerinde mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Mahmud Usta b. Ahmed, Veli Usta b. Hüseyin, Mehmed Efendi b. ( ) el-İmâm, Mustafa Bey b. İbrahim Kâtib-i mukāta‘a, Abdurrahman Çelebi b. el-Hâc Ali el-Câbî, Hasan Bey b. Ferhad, Mehmed Çelebi b. Kasım, Ahmed Beşe b. Hasan el-Bostânî, Oruc b. Hüseyin, Mehmed b. Haydar, Mustafa b. Mehmed Muhzır ve gayruhüm.