Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 66 Hüküm no: 30 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Efendi’nin vakfettiği tarlalar ve boş arsanın mutasarrıfının Hatice Hatun bt. Mustafa olduğunun tescil edildiği Husûs-ı âti’l-beyânın mahallinde tahrîri iltimâs olunmağın hâkim-i muvakkı‘-ı kitâb tûbâ-lehû ve hüsnü-meâb dahi mahmiye-i Galata kazâsına tâbi‘ kasaba-i Beşiktaş’da vâki‘ merhûm ve mağfûrun-leh Yahya Efendi’nin evlâdına ve evlâd-ı evlâdına vakfı olup merhûm Sultân Bayezid Hân aleyhi’r-rahmetü ve’r-rıdvân vakfına senede altı yüz elli akçe mukāta‘a-i zemîni olan lede’l-ahâlî ma‘lûmü’l-hudûd tarlalar ve arsa-i hâliyelerine varup akd-i meclis-i şer‘-i şerîf eyledikde merhûm Sultân Bayezid Hân hazretleri vakfının mukāta‘a kâtibi olan Mustafa Bey b. İbrahim ve mukāta‘a-i mezbûrun câbîsi olan Abdurrahman Çelebi b. el-Hâc Ali nâm kimesneler meclis-i mezbûrda merhûm-ı mezbûr Yahya Efendi’nin evlâdı evlâdından olup hâlâ zikri mürûr eden tarlaları ve arsa-i hâliyeleri mutasarrıfe olan işbu râfi‘atü’l-kitâb fahrü’l-muhadderât tâcü’l-mestûrât Hadice Hatun bt. Mustafa Efendi tarafından husûs-ı âti’z-zikri tasdîka nehc-i şer‘î üzere vekîl olan zevci aynü’l-a‘yân Haydar Ağa b. Yahya nâm kimesne muvâcehesinde herbiri ikrâr ve takrîr-i kelâm edüp zikr olunan tarlaların ve arsa-i hâliyenin temessükâtı ki mezbûre Hadice Hatun yedinde makbûzdur hâlâ mukāta‘a-i mezkûr defterinde dahi minvâl-i meşrûh üzere mukayyed ve mestûr olup mezbûre Hadice Hâtûn’dan gayrı kimesnenin alâka ve medhali yokdur dediklerinde mukırrân-ı mezbûrânın cârî ve sâdır olan ikrârını vekîl-i merkūm Haydar Ağa vicâhen tasdîk ve şifâhen tahkīk edicek işbu hurûf ber-sebîl-i temessük ketb olunup yed-i tâlibe def‘ olundu. Fi’l-yevmi’s-sâbi‘ ve’l-ışrîn min-Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Şuhûdü’s-sâbıkūn, es-sâbıkūn.