Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 67 Hüküm no: 31 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Kethüdâ b. Bayram’ın nukud vakfının mütevellisi Belkıs Hatun bt. Abdülmennan’ın önceki mütevelli Eşref Efendi b. Veli’den vakfın parasını teslim aldığı Mahmiye-i Galata’ya tâbi‘ kasaba-i Beşiktaş mahallâtından Sinan Paşa-yı Cedîd mahallesinde sâkin iken bundan akdem vefât eden Ali Kethüdâ b. Bayram’ın vakf eylediği on dokuz bin nakd akçenin hâlâ mütevellîsi olan fahrü’l-muhadderât tâcü’l-mestûrât Belkıs Hatun bt. Abdülmennan’ın tarafından husûs-ı âti’l-beyânı ikrâra vekîl olup mezbûreyi ma‘rifet-i şer‘iyye ile ârifân olan Ali Efendi b. Yusuf ve Mustafa Çelebi b. Şaban Ağa nâm kimesneler şehâdetleri ile şer‘an vekâleti sâbite olan Enver Efendi b. Salih nâm kimesne mahfil-i şer‘-i kavîm-i vâcibü’t-tekrîmde vakf-ı mezkûrun sâbıkā mütevellîsi olan fahrü’l-hutebâ Eşref Efendi b. Veli nâm kimesne muvâcehesinde bi’l-vekâle ikrâr ve takrîr-i kelâm edüp bundan akdem merkūm Eşref Efendi vakf-ı mezkûrun mütevellîsi olup meblağ-ı mezbûr zimmetinde iken tevliyet-i mersûmu müvekkilem mezbûre Belkıs Hatun’a ferâğ eyledikde meblağ-ı mezkûru [10b] dahi mezbûre Belkıs Hatun’a def‘ u teslîm eyleyüp ol dahi bi’t-tamâm ve’l-kemâl merkūm Eşref Efendi yedinden tevliyyeti hasebiyle ahz u kabz edüp mezbûr Eşref Efendi zimmetinde meblağ-ı mezkûrdan bir akçe ve bir habbe bâkī kalmamışdır dedikde vekîl-i mezbûrun cârî ve sâdır olan ikrârını merkūm Eşref Efendi vicâhen tasdîk ve şifâhen tahkīk eylemeğin mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene isneyn ve sittîn ve elf. Şühûdü’l-hâl: Abbas Bey b. İbrahim Bey, Bayram Ağa b. Abdülmennan, Abdülkerim Çelebi b. Yahya el-İmâm, Ali Çelebi b. Cafer Müezzin, Cafer Bey b. Ahmed, Mehmed Bey b. Mahmud, Ebûbekir Çelebi b. Ebûbekir, Durmuş Kapudan b. Yahya, Zülfikār Bey b. Abdullah, Mustafa b. Mehmed Muhzır.