Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 70 Hüküm no: 34 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lanberto v. Anderya’nın arsasını Yorgi v. İstati’ye sattığı Mahmiye-i Galata muzâfâtından kasaba-i Beşiktaş’a tâbi‘ Arnavud nâm karye sükkânından Lanberto v. Anderya nâm zimmî meclis-i şer‘-i hatîr-i lâzımü’t-tevkīrde işbu râfi‘ü’s-sifr Yorgi v. İstati nâm zimmî muvâcehesinde bi-tav‘ihî ikrâr ve takrîr-i kelâm edüp silk-i mülkümde münselik olup karye-i mezbûrede vâki‘ bir tarafı Biconi Yani nâm zimmî mülkü ve iki tarafı yine kendi mülküm ve bir tarafı tarîk-i âm ile mahdûd tûlen on üç zirâ‘ ve arzen on iki zirâ‘ mülk arsa-i hâliyemi mezbûr Yorgi’ye on yedi kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr on yedi kıt‘a riyâlî guruş-ı kebîri merkūm Yorgi yedinden bi’t-tamâm ve’l-kemâl ahz u kabz eyledim ba‘de’l-yevm arsa-i mezkûre mezbûr Yorgi’nin mülk-i müşterâsı ve hakk-ı sırfıdır keyfe mâ yeşâ ve yehtâr sâir emlâki tasarrufu gibi mutasarrıf olsun dedikde mukırr-ı mezbûr Lenberyo’nun cârî ve sâdır olan ikrârını el-mukarru lehü’l-merkūm Yorgi bi’l-müvâcehe tasdîk ve bi’l-müşâfehe tahkīk edicek mâ-hüve’l-vâkı‘ bi’t-taleb ketb olundu. Tahrîren fi’l-yevmi’r-râbi‘ min-Muharremi’l-harâm li-sene isneteyn ve sittîn ve elf. Şühûdü’l-hâl: Mahmud Çelebi b. el-Hâc Mehmed, Nasûh Çelebi b. Musa, Hacı Abdurrahman b. Yunus, Ali Beşe b. Abdullah, Mustafa Reis b. Abdullah, Mustafa b. Mehmed Muhzır, ve gayruhüm. Androni v. Yani, Yorgo v. Mitoli, Difeko v. Kosto, Yorgi v. Nikite, Yorgi v. Kalfa Yani Biconi.