Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 71 Hüküm no: 35 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryora bt. Orniyoz’un bağını daha önce Dimitri v. Vasil’e sattığının tescili Mahmiye-i Galata muzâfâtından Orta nâm karye sâkinelerinden Maryora bt. Orniyoz nâm zimmiyye tarafından bey‘-i âti’l-beyânı ikrâra vekîl olup mezbûreyi ma‘rifet-i şer‘iyye ile ârifân olan Panayot v. Yani ve Todori v. İstemad nâm zimmîler şehâdetleri ile şer‘an vekâleti sâbite olan zevci Yani v. Kostantin nâm zimmî mahfil-i kazâda mahall-i irtizâda Dimitri v. Vasil nâm zimmî muvâcehesinde bi’l-vekâle ikrâr-ı tâm ve takrîr-i kelâm edüp müvekkilem merkūmenin karye-i mezbûre toprağında Kasımdulu demekle ma‘rûf mevzi‘de vâki‘ bir tarafı Arslan nâm Yahudinin harâbe bağ yeri ve bir tarafı Kanelo nâm zimmî tarlası ve bir tarafı Kebeci nâm Ermeni bağı ve bir tarafı vâdi ile mahdûd arsasının Sultân Bayezid Hân aleyhi’r-rahmetü ve’l-gufrân evkāfına mukāta‘a-i mu‘ayyenesi olan tahmînen altı dönüm mikdârı mülk harâbe bağ yerini târih-i kitâbdan dokuz yıl mukaddem merkūm Dimitri’ye iki bin nakd akçeye tefvîz edüp ol dahi tefevvüz ve kabûl eyledikden sonra mukābele-i tefvîzde yedinden iki bin akçeyi alıp kabûl ve kabz eyleyüp zabtı için mahallinde taslît dahi eyledim deyicek mukırr-ı mezbûru ikrâr-ı meşrûhunda sâlifü’z-zikr Dimitri bi’l-müvâcehe tasdîk ve bi’l-müşâfehe tahkīk edicek mâ-hüve’l-vâkı‘ gıbbe’t-taleb ketb ü imlâ olunup men lehü’t-taleb yedine vaz‘ olundu. Tahrîren fî-evâsıtı Zilhicceti’ş-şerîfe li-sene ihdâ ve sittîn ve elf. Şühûdü’l-hâl: Arslan Beşe b. Hasan, Mehmed Beşe b. Abdullah, Ramazan b. Ahmed, el-Hâc Mehmed b. İsmail, Receb b. Ahmed, Pîrî bey b. Erdoğdu, Ahmed Beşe er-râcil, Mahmud b. Mehmed, Mehmed Beşe b. ( ) Odabaşı ve gayruhüm. Nikola v. Rado, Sagīr Yorgi v. Kostantin, Papa v. Yorgi.