Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 71 Hüküm no: 36 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Vasil’in bağını Avraham v. David’e sattığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sükkânından Dimitri v. Vasil nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden olup Senyora cemâ‘atinden işbu râfi‘ü’s-sifr Avraham v. David nâm Yahudi muvâcehesinde bi-tav‘ihî ikrâr ve takrîr-i kelâm edüp silk-i mülkümde münselik olup karye-i mezbûre bağları sınırında Kasımdulu nâm mevzi‘de vâki‘ merhûm Sultan Bayezid Hân tâbe serâhû hazretleri vakfına mukāta‘a-i zemîni olan mülk bağımın bir tarafı Arslan nâm Yahudinin harâbe bağ yeri ve bir tarafı Kebeci demekle ma‘rûf Ermeni bağı ve bir tarafı Kanelo nâm zimmî tarlası ve bir tarafı vâdi ile mahdûd tahmînen sekiz dönüm mikdârı bağımı mezbûr Avraham nâm Yahudiye dört yüz kıt‘a tâmmü’l-vezn ve kâmilü’l-ayâr riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr dört yüz kıt‘a riyâlî guruşu merkūm Avraham yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden bağ mersûm Avraham’ın mülk-i müşterâsı ve hakk-ı sırfıdır keyfe mâ yeşâ ve yehtâr sâir emlâki tasarrufu gibi mutasarrıf olsun dedikde mukırr-ı mezbûr Dimitri’nin cârî ve sâdır olan ikrârını el-mukarru lehü’l-merkūm Avraham bi’l-müvâcehe tasdîk ve bi’l-müşâfehe tahkīk edicek mâ-hüve’l-vâkı‘ bi’t-taleb ketb olundu. Tahrîren fi’l-yevmi’s-sâlis min-Muharremi’l-harâm li-sene isneteyn ve sittîn ve elf. Şühûdü’l-hâl: Mahmud Efendi b. Mehmed el-İmâm, Mustafa Çelebi b. Abdi Efendi, Mustafa Halîfe b. Halil el-Müezzin, Mehmed Beşe b. Hasan Odabaşı, Arslan Beşe b. Hasan, Ebûbekir Çelebi b. Mehmed el-Müezzin, Receb Beşe b. Ahmed Nâzır, Ahmed Beşe b. Abdullah Tellâk, Mustafa b. Mehmed Muhzır, Mehmed b. Ramazan Muhzır ve gayruhüm. Laskadi v. Yani, Todori v. Yorgi, Yorgaki v. Yorgo, Yako v. Yihana? İsrail v. Yako.