Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 99 Hüküm no: 102 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Yani’nin evini kızı ve damadına sattığı Pendik karyesinde mütemekkin Çoban Yani v. İstefan zimmî meclis-i şer‘-i hatîrde sulbiye kebîre kızı ve dâmâdı işbu râfi‘ü’r-rakīm Yerakine? Nasrâniye ve Yorgaki v. Panayot zimmî muvâcehelerinde bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin yedimde mülk ve hakkım olup karye-i mezbûrda vâki‘ bir tarafı Rado Panayot menzili ve bir tarafı Moralı Tanaş menzili ve bir tarafı Çoban İstamolçe? menzili ve bir tarafı tarîk-i âm ile mahdûd fevkānî iki bâb oda ve tahtında bir sofa ve mahzen ve sokak kapıyı müştemil mülk menzilimi bi-cümleti’t-tevâbi‘ tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşteriyân-ı merkūmâna iki yüz guruşa bey‘ u teslîm ve temlîk eylediğimde onlar dahi ber-vech-i muharrer ale’l-iştirâki’s-seviy iştirâ ve tesellüm ve temellük ve kabz u kabûl eylediklerinden sonra semeni olan meblağ-ı mezkûr iki yüz guruşu müşteriyân-ı mezbûrân yedinden bi’t-tamâm ve’l-kemâl ahz ü kabz eyledim fîmâ-ba‘d zikri mürûr eden menzilde vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup müşteriyân-ı mezbûrânın ale’l-iştirâki’s-seviy mülk-i müşterâları ve hakk-ı sırfları olmuşdur keyfe mâ yeşâ’ân ve yahtârân mutasarrıf olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Recebi’l-ferd li-sene ihdâ ve semânîn ve mi’ete ve elf. Şuhûdü’l-hâl: Vasil v. Panayot, Frankovilo v. Macer Yamandi?, Kiryaco v. Panayot, Lazari v. Panayot, Uskolya v. Ravi, Panayot v. Tarandafil, Aci Londeri v. Vasilikos ve gayruhum.