Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 75 Hüküm no: 42 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mustafa Efendi’nin arsasını Mehmed Efendi b. Zülfikar’a sattığı Mahmiye-i Galata’ya tâbi‘ kasaba-i Beşiktaş’da vâki‘ merhûm Yahya Efend- kuddise sırruhü’l-azîz-hazretlerinin ma‘lûmü’l-hudûd arsa-i hâliyesinin merhûm Sultân Bayezid Hân-tâbe serâhû-vakfına mukāta‘a-i mu‘ayyenesi olup arsa-i mezkûreyi mülkiyet üzere mutasarrıfe olan merhûm-ı mezbûr Yahya Efendi’nin evlâdından fahrü’l-muhadderât Hadice Hatun bt. Mustafa Efendi tarafından husûs-ı âti’l-beyânı ikrâra nehc-i şer‘î üzere vekîl olan oğlu Mustafa Çelebi b. Ahmed Efendi nâm kimesne mahfil-i kazâda işbu râfi‘ü’l-kitâb Mehmed Efendi b. Zülfikār nâm kimesne muvâcehesinde bi’l-vekâle ikrâr ve takrîr-i kelâm edüp müvekkilem merkūmenin arsa-i mezkûresinden olup bir tarafı Faik nâm kimesne mülkü ve iki tarafı yine müvekkile-i mezbûrenin arsa-i hâliyesi ve bir tarafı tarîk-i âm ile mahdûd tûlen otuz dört zirâ‘ ve arzen yirmi beş zirâ‘ arsa-i hâliyeyi mezbûr Mehmed Efendi’ye yirmi kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm eyledikden sonra semeni olan meblağ-ı mezbûr yirmi kıt‘a riyâlî guruş-ı kebîri mezbûr Mehmed Efendi yedinden bi’t-tamâm ve’l-kemâl ahz u kabz [14a] eyledi ba‘de’l-yevm arsa-i mezbûre merkūm Mehmed Efendi’nin mülk-i müşterâsıdır keyfe mâ yeşâ ve yehtâr sâir emsâli tasarrufu gibi mutasarrıf olsun dedikde vekîl-i mezbûrun cârî ve sâdır olan ikrârını merkūm Mehmed Efendi vicâhen tasdîk ve şifâhen tahkīk edicek mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Muharremi’l-harâm li-sene isneteyn ve sittîn ve elf. Şühûdü’l-hâl: Abdurrahman Efendi el-Kadı, Hasan Bey b. Ferhad, Abdülkerim Bey el-Cündî, Kadri Çelebi b. Süleyman, Seyyid Şaban b. Veli, Hasan Çelebi b. Muharrem Bey, Mustafa Bey b. İbrahim el-Kâtib, Abdurrahman Çelebi b. Ali Câbî, İbrahim Efendi el-Müderris, el-Hâc Piyâle b. Abdullah, Ali Beşe b. Hasan, Yahya Çelebi b. Hasan Müezzin, Hasan Beşe b. Abdullah, Himmet Beşe b. Mahmud.