Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 76 Hüküm no: 43 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli b. Pîrî’nin evini hanımı Cennet bt. İbrahim’e hibe ettiği Cennet’in de kocasında olan alacağından feragat ettiği Mahmiye-i Galata muzâfâtından kasaba-i Beşiktaş’da vâki‘ merhûm ve mağfûrun-leh Sultân Süleyman Hân aleyhi’r-rahmetü ve’l-gufrân mahallesinde sâkin Veli b. Pîrî nâm kimesne işbu hâfızü’l-vesîka zevcesi Cennet Hatun bt. İbrahim muvâcehesinde ikrâr u i‘tirâf edüp silk-i mülk-i sahîhimde münselik bir tarafı Hızır Beşe mülkü ve bir tarafı Sero nâm Hatun mülkü ve bir tarafı tarîk-i hâs ve bir tarafı tarîk-i âm ile mahdûd tahtânî iki bâb beyti ve bir sofayı ve muhavvata ve bi’r-i mâ ve kenîfi müştemil mülk-i sarîhimi mezbûre Cennet Hatun’a hibe ve temlîk edüp ol dahi ittihâb ve kabûl ve kabz eyledi dedikde gıbbe’t-tasdîki’ş-şer‘î vicâhen mezbûre Cennet dahi zevcim zimmetinde karz-ı şer‘îden üç bin akçemi ve mehr-i müeccelim olan bin akçe ki cem‘an dört bin akçe hakkımı menzil-i mevhûb-ı mezkûr mukābelesinde ben dahi tefvîz eyledim dedikde ol dahi tefevvüz ve kabûl etmeğin mâ-hüve’l-vâkı‘ bi’t-taleb ketb olundu. Fî-evâsıti’l-Muharremi’l-harâm li-sene isneteyn ve sittîn ve elf. Şühûdü’l-hâl: Nasûh Efendi b. Mustafa el-İmâm, Ahmed Çelebi b. Nasûh, Mustafa Bey b. Ali, Ali Çelebi b. Nuh, Mustafa b. Ali, Mustafa b. Mehmed, Pîrî b. Ali el-Müezzin ve gayruhüm.