Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 77 Hüküm no: 45 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Dede b. Cafer’in Üçüncü Sekbanlar Cemaati ihtiyaçlarına sarf edilmek üzere vasiyyet ettiği paranın 370 kuruş olduğunun tescili Dergâh-ı âlî dâme mahfûfen bi’l-me‘âlî yeniçerilerinden ve Üçüncü Sekbânlar odası cemâ‘atinden işbu hâfıziyyü’l-kitâb Mehmed Beşe b. İbrahim ve Ebûbekir Beşe b. Ahmed ve Mustafa Beşe b. Receb ve gayrılar mahfil-i kazâda oda-i mezbûrenin bi’l-fi‘il odabaşısı olmağla oda-i mezbûrenin mühimmâtına ve harc-ı lâzımına vaz‘ olunan nukūda vaz‘-ı yed eden Mustafa Odabaşı b. Mehmed muvâcehesinde herbiri takrîr-i kelâm edüp cemâ‘at-ı merkūmeden olup bundan akdem fevt olan Hasan Dede b. Cafer’in oda-i merkūme cemâ‘atinin mühimmâtına vasiyyet ve ta‘yîn eylediği akçesi ne mikdârdır ma‘lûmumuz olmak için suâl olunsun dedikde gıbbe’s-suâl cevâbında Hasan Dede’nin Beşiktaş’da fürûht olunan menzil bahâsından iki yüz otuz beş guruş ve sâir muhallefâtı bahâsından yüz otuz beş guruş cem‘an üç yüz yetmiş nakd guruşu vardır dediği talebleriyle ketb olunup yedlerine def‘ ve teslîm olundu vakt-i [hâcetde] ihticâc eyleyeler. Hurrire fi’l-yevmi’s-sâlis aşer mine’l-Muharremi’l-harâm li-sene isneteyn ve sittîn ve elf. Şühûdü’l-hâl: Mustafa Halîfe b. Yakub, Mustafa Çelebi b. Şaban, Osman Beşe b. Ali, Hüseyin Beşe b. İsmail.