Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 77 Hüküm no: 46 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed’in evini Rıdvan b. Abdullah’a sattığı Mahmiye-i Galata muzâfâtından kasaba-i Beşiktaş’da Kuruçeşme nâm karye sâkinlerinden Ahmed b. Mehmed nâm kimesne mahfil-i kazâda Rıdvan b. Abdullah nâm kimesne muvâcehesinde ikrâr ve i‘tirâf edüp karye-i mezbûrede vâki‘ bir tarafı benim yetîmlerim Âişe ve Mehmed mülkleri ve bir tarafı Lanborloz nâm zimmî mülkü ve bir tarafı Medîne-i Münevvere Vakfı ve bir tarafı tarîk-i âm ile mahdûd fevkānî bir bâb odayı ve bir matbah odasını ve tahtânî yine bir bâb odayı ve önünde limanı ve dehlîzi ve muhavvata ve kenîfi müştemil mülk menzilimi cümle tevâbi‘ ve levâhıkı ile yüz seksen aded tâmmü’l-vezn riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabz eyledikden sonra semeni olan meblağ-ı mezbûr seksen guruşu yedinden bi’t-tamâm ve’l-kemâl ahz u kabz eyledim ba‘de’l-yevm mülk-i müşterâsıdır keyfe mâ yeşâ ve yehtâr mutasarrıf olsun deyicek gıbbe’t-tasdîki’ş-şer‘î vicâhen mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ aşer mine’l-Muharremi’l-harâm li-sene isneteyn ve sittîn ve elf. Şühûdü’l-hâl: Hasan Ağa b. Abdullah, Şaban Ağa b. İbrahim, Mehmed Ağa b. Mustafa, Mustafa Efendi b. Halil, İsmail b. Hasan, Ahmed Beşe b. İbrahim, Mehmed b. Şaban ve gayruhüm.