Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 78 Hüküm no: 47 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan b. Abdullah ile hanımı Ayşe bt. Abdullah’ın evlerini Ali Beşe b. Mehmed’e sattıkları Mahmiye-i Galata’ya tâbi‘ kasaba-i Beşiktaş’da vâki‘ Arab İskele[si] demekle ma‘rûf mahalle sükkânından Rıdvan b. Abdullah nâm kimesne ve zevcesi Âişe bt. Abdi nâm hatun tarafından menzil-i âti’l-beyânın nısfını bey‘a ve semenini ahza vekîl olup mezbûreyi ma‘rifet-i şer‘iyye ile ârifân olan Mustafa Çelebi b. İbrahim Efendi el-İmâm ve İbrahim Çelebi b. el-Hâc Mahmud nâm kimesneler şehâdetleri ile şer‘an vekâleti sâbite olan Veli b. Bâli nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâb Ali Beşe b. Mehmed nâm kimesne muvâcehesinde herbiri asâleten ve vekâleten ikrâr ve takrîr-i kelâm edüp mahalle-i mezbûrede vâki‘ bir tarafı merhûm Tekerlek Mustafa Çelebi’nin vakıf odaları ve bir tarafı merhûm Ahmed Çelebi’nin eytâmı Ali ve Hatice’nin mülkleri ve bir tarafı tarîk-i âm ile mahdûd fevkānî ve tahtânî iki bâb beyti ve bir sofayı ve cüneyneyi ve bir bi’r-i mâyı ve kenîfi müştemil mülk menzilin nısfı kendi mülküm ve nısf-ı âharı dahi müvekkile-i mezbûre Âişe Hatun’un mülkü olup hâlâ menzil-i mezbûru cümle tevâbi‘ ve levâhıkı ile mezbûr Ali Beşe’ye on üç bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile her birimiz bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mezkûr on üç bin akçeyi herbirimiz asâleten ve vekâleten merkūm Ali Beşe yedinden bi’t-tamâm ve’l-kemâl ahz u kabz eyledik ba‘de’l-yevm menzil-i mezkûr merkūm Ali Beşe’nin mülk-i müşterâsıdır keyfe mâ yeşâ ve yehtâr mutasarrıf olsun dediklerinde mukırrân-ı mezbûrânın cârî ve sâdır olan ikrârlarını el-mukarru lehü’l-merkūm Ali Beşe bi’l-müvâcehe tasdîk ve bi’l-müşâfehe tahkīk edicek mâ-vaka‘a bi’t-taleb ketb olundu. Tahrîren fi’l-yevmi’l-hâdî aşer mine’l-Muharremi’l-harâm li-sene isneyn ve sittîn ve elf. Şühûdü’l-hâl: Mustafa Bey b. Ahmed el-Yesârî, Abdülkerim Çelebi b. Şaban, Yusuf Efendi b. Abdülkerim el-Müezzin, Kurd Çelebi b.( ) el-Müezzin, Kadri Çelebi b. el-Hâc Mehmed, Mehmed Çelebi b. Ali.