Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 79 Hüküm no: 48 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Neslihan Hatun b. Hasan’ın vârislerinin tereke hisselerini teslim aldıkları Bundan akdem fevt olan Neslihan Hatun b. Hasan’ın verâseti zevc-i metrûkü İbrahim Bey b. Abdülmennan nâm cündîye ve vâlidesi Fâtıma Hatun b. Mahmud’a ve li-ebeveyn er karındaşı Mehmed ve kız karındaşı Âişe’ye münhasıra idüği şer‘an mütehakkık oldukdan sonra mezbûr Mehmed kendi tarafından asâleten ve mezbûretânlar taraflarından dahi husûs-ı âti’l-beyâna vekîl olup mezbûretânı ma‘rifet-i şer‘iyye ile ârifân olan Mehmed b. Abdullah ve Ali b. Abdülmennan şehâdetleriyle şer‘an vekâleti sâbite oldukdan sonra vekâleten meclis-i şer‘de mezbûre Neslihan’ın muhallefâtına vâzı‘ü’l-yed olan zevci mezbûr İbrahim Bey muvâcehesinde ikrâr u i‘tirâf edüp ba‘de’l-harc ve’l-mesârif ber-mûceb-i defter-i kassâm-ı asker on altı bin beş yüz otuz yedi akçe hesâb olunup meblağ-ı mezbûrdan üç bin altı yüz yetmiş beş akçe benim hisseme isâbet edüp ve iki bin yedi yüz elli altı akçe müvekkilem Fâtıma’ya ve bin sekiz yüz otuz yedi akçe diğer müvekkilem vâlidem merkūme Âişe Hatun’a isâbet etmeğin cem‘an sekiz bin iki yüz altmış sekiz akçe hisse-i şer‘iyyelerimizi merkūm İbrahim Bey yedinden asâleten ve vekâleten ahz u kabz eyledim deyicek gıbbe’t-tasdîki’ş-şer‘î vicâhen mâ-hüve’l-vâkı‘ bi’t-taleb ketb olundu. Hurrire fî-evâsıti’l-Muharremi’l-harâm li-sene isneteyn ve sittîn ve elf. Şühûdü’l-hâl: Köse Cafer Bey, el-Hâc Ali b. Abdullah, Mehmed Çelebi b. Ahmed el-Yesârî, Mustafa Çelebi el-Cündî, ve gayruhüm. Beyâz sahh.