Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 167 Hüküm no: 118 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Aci Gabril’in Karamanlı Aci Aslanoğlu Mina aleyhindeki alacak davasının reddedilmesi Ma‘rûz, Medîne-i Üsküdar’da mütemekkin derûn-ı arzuhâlde ismi mastûr Sarrâf Aci Gabril v. Artin zimmî meclis-i şer‘-i hatîrde arzuhâl eden Karamanlı Aci Aslanoğlu Mina v. Kaplan zimmî muvâcehesinde benim işbu hâzır bi’l-meclis Duhânî Hıristo v. Efram zimmî zimmetinde cihet-i karzdan bin beş yüz guruş alacak hakkım olup bin ikiyüz elli üç senesi Recebi’l-müreccebi gurresinde hâzır-ı mersûm beni deyn-i mezkûruyla mersûm Mina zimmînin üzerine üçümüz bir meclisde iken havâle-i mutlaka ile havâle edip beher birimiz havâle-i mezkûreyi kabûl eylediğimizden sonra mersûm Mina zimmî havâle-i mezkûreye binâen meblağ-ı merkūmun yedi yüz elli guruşunu sene-i mezkûre şehr-i Ramazani’l-mübâreki’nin beşinci günü bana edâ etmekle mâ‘adâ yedi yüz elli guruş zimmetinde bâkī kalıp hattâ mersûm Mina zimmî meblağ-ı bâkī-i merkūm yedi yüz elli guruş cihet-i mezkûreden zimmetinde bana deyni olduğunu işbu târîh-i i‘lâm-ı şehrî Şa‘bânü’l-mu‘azzamı’nın yedinci günü medîne-i mezkûreye muzâfe Kartal kasabasında ikrâr ve ferdâsı günü hâlâ kasaba-i mezkûre nâibi Mehmed Salih Efendi huzûrunda mersûm ile terâfu‘larımızda inkâra mukārin ikrâr-ı meşrûhunu şuhûd-ı udûlle isbât edip mûcebince nâib-i merkūm meblağ-ı mezkûr yedi yüz elli guruşu mersûm Mina zimmîden bana hükm dahi edip yedime bir kıt‘a i‘lâm vermekle meblağ-ı mezkûr yedi yüz elli guruşu mersûm Mina zimmîden hâlâ taleb ederim deyü i‘lâm-ı mezkûru ibrâzıyla da‘vâ etdikde, ol dahi cevâbında ikrâr-ı mezkûru kemâ-fi’s-sâbık inkârından mâ‘adâ müdde‘î-i sarrâf-ı mersûm meblağ-ı merkūm bin beş yüz guruşu benden da‘vâ sadedinde iken sâlifü’l-beyân bin iki yüz elli üç senesi şehr-i Ramazani’l-mübâreki’nin beşinci günü târîhinde İslambol Duhân Gümrüğü civârında vaki‘ Duhânî Boroş zimmînin dükkânında da‘vâ-yı mezkûresinden benimle kat‘an li’n-nizâ‘ sekiz yüz guruşa sulh olup ben dahi sulh-ı mezkûru ba‘de’l-kabûl müdde‘î-i mersûm bedel-i sulh-ı mezkûr sekiz yüz guruşu dahi meclis-i sulhda benden tamâmen ahz u kabz ve ziyâde müdde‘âsına ve târîh-i merkūma gelince sâir cemî‘ hukūk-ı şer‘iyyeye müte‘allika âmme-i de‘âvîden benim zimmetimi kabûlümü hâvî ibrâ-i âm ile ibrâ ve iskāt etmiş idi deyü inkârına mukārın eylediği def‘ini her biri mahâllinden lede’t-tezkiye makbûlü’ş-şehâde idükleri ihbâr olunan gümrük-i mezkûr civârında mütemekkinler Duhânî Anaştaş v. Aci Pretamoz ve Duhânî Hıristo v. İstefan nâm zimmîler şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘î-i mersûm Aci Kabril zimmî da‘vâ-yı mezkûresiyle mesfûr Mina zimmîye bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 28 Ş sene [1]256.