Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 168 Hüküm no: 119 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Arakiyeci mahallesi ahalisinden Safiye’nin alacak davasında anlaşma sağlanması Ma‘rûz, Medîne-i Üsküdar’da Arakiyeci mahallesinde sâkine sâhibe-i arzuhâl mu‘arrefetü’z-zât Safiye bt. İbrahim Edhem nâm hatun Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde üveyi vâlidesi derûn-ı arzuhâlde mezkûretü’l-ism mu‘arrefetü’z-zât Şerife Hadice bt. es-Seyyid Ali nâm Hatun muvâcehesinde işbu târîh-i i‘lâmdan dört sene mukaddem mezbûre Şerife Hadice Hatun malımdan iki bin ikiyüz guruş kıymetli harc-ı felek resminden iki elmas iğnemi bi-gayr-ı hakkın fuzûlî ahz ve istihkāk etmekle kıymet-i mezkûresini mezbûre Şerife Hadice Hatun’dan bi-tarîkı’d-damân hâlâ taleb ederim deyü da‘vâ eylediğimde, ol dahi cevâbında külliyen [30a] inkâr ve ol vechile beynimizde ba‘de vukū‘i’l-münâza‘a muslihûn tavassutuyla beynimiz ıslâh ve tanzîm olunup ben ber-vech-i muharrer tasaddî eylediğim da‘vâ-yı mezkûremden mezbûre Hatice Hatun ile bi’t-tav‘ ve’r-rızâ yedi yüz guruş üzerine ba‘de akdi’l-musâlaha ve’l-kabûl mâ‘adâya ve bi’l-cümle husûs-ı mezkûra müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yedi yüz guruşun müdde‘iyye-i mezbûre Safiye Hatun’a edâ ve teslîmiyle merkūme Şerife Hadice Hatun ilzâm olunduğu huzûr-ı âlîlerine i‘lâm olundu. Fî 23 B sene [1]256.