Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 84 Hüküm no: 56 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arslan Beşe b. Hasan’ın bağını Mustafa Ağa b. Sinan’a sattığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden Arslan Beşe b. Hasan nâm kimesne mahfil-i kazâda işbu sâhibü’l-kitâb aynü’l-a‘yân Mustafa Ağa b. Sinan nâm kimesne muvâcehesinde bi-tav‘ihâ ikrâr ve takrîr-i kelâm edüp silk-i mülkümde münselik olup karye-i mezbûre bağları sınırı dâhilinde Kasımdulu nâm mevzi‘de vâki‘ bir tarafı Mahmud Usta bağı ve bir tarafı Osman Usta bağı ve bir tarafı Mehmed Beşe bağı ve bazen tarîk-i âm ve bir tarafı Yamaniti nâm zimmî bağı ile mahdûd tahmînen on dönüm mikdârı mülk bağımı târih-i kitâbdan altı ay mukaddem müşârun ileyh Mustafa Ağa’ya dört yüz kıt‘a tâmmü’l-vezn ve kâmilü’l-ayâr riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eylediğinden sonra semeni olan meblağ-ı mârrü’z-zikr dört yüz kıt‘a riyâlî guruş-ı kebîri müşârun ileyh Mustafa Ağa yedinden bi’t-tamâm ve’l-kemâl ahz u kabz eyledim târih-i <> mezbûrdan zikri mürûr eden bağ müşârun ileyh Mustafa Ağa’nın mülk-i müşterâsı ve hakk-ı sırfıdır keyfe mâ yeşâ ve yehtâr sâir emlâki tasarrufu gibi mutasarrıf olsun dedikde mukırr-ı mezbûr Arslan Beşe’nin cârî ve sâdır olan ikrârını el-mukarru lehü’l-müşârun ileyh Mustafa Ağa bi’l-müvâcehe tasdîk ve bi’l-müşâfehe tahkīk etmeğin mâ-hüve’l-vâkı‘ bi’t-taleb ketb olunup yed-i tâlibe def‘ [ve] vaz‘ olundu. Fi’l-yevmi’r-râbi‘ ve’l-ışrîn min-Muharremi’l-harâm li-sene isneteyn ve sittîn ve elf. Şühûdü’l-hâl: Mahmud Efendi b. Mehmed el-İmâm, Mustafa Çelebi b. Abdi Efendi, Hüseyin Ağa b. Mustafa, Mustafa Halîfe el-Müezzin, Mustafa Efendi el-İmâm, Ebûbekir Çelebi b. Mehmed Müezzin, Pîrî Bey b. Erdoğdu, Nasûh Çelebi b. Musa, Mehmed Beşe b. Hasan, Receb Beşe b. Ahmed, Mehmed Beşe b. Ramazan, Mustafa b. Mehmed Muhzır.