Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 85 Hüküm no: 57 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey b. Hacı İbrahim’in bağını Dimitri v. Vasil’e sattığı Mahmiye-i Galata muzâfâtından kasaba-i Tophane mahallâtından Hoca Ali mahallesi sâkinlerinden İsmail Bey b. el-Hâc İbrahim nâm kimesne meclis-i şer‘-i şerîf-i lâzımü’t-teşrîfde işbu râfi‘ü’s-sifr Dimitri v. Vasil nâm zimmî muvâcehesinde bi-tav‘ihî ikrâr ve takrîr-i kelâm edüp mahmiye-i mezbûre muzâfâtından kasaba-i Beşiktaş’a tâbi‘ Orta nâm karye bağları sınırı dâhilinde Kasımdulu demekle ma‘rûf mevzi‘de vâki‘ bir tarafı yine kendi tarlam ve bir tarafı mezbûr Dimitri bağı ve bir tarafı Menyami nâm Yahudi bağı ve bir tarafı Angeli bağı ve bazen vâdi ile mahdûd tahmînen beş dönüm mikdârı mülk harâbe bağ yerimi merkūm Dimitri nâm zimmîye beş bin beş yüz nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr beş bin beş yüz akçeyi yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden bağ yeri mersûm Dimitri’nin mülk-i müşterâsıdır keyfe mâ yeşâ ve yehtâr sâir emlâki gibi mutasarrıf olsun dedikde mukırr-ı mezbûr İsmail Bey’in cârî ve sâdır olan ikrârını el-mukarru lehü’l-mezbûr Dimitri vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Muharremi’l-harâm li-sene isneteyn ve sittîn ve elf. Şühûdü’l-hâl: Mahmud Çelebi b. el-Hâc Mehmed, Ali Çelebi b. Ahmed, Mehmed Bey b. Şaban Bey, [18a] Abdülbâkī Çelebi b. Derviş, Pîrî Bey b. Erdoğdu, Mahmud Efendi b. Mehmed el-İmâm, Receb Beşe b. Hasan, Arslan Beşe b. Hasan, Mustafa b. Mehmed Muhzır, el-Hâc Bâli b. Mahmud, Mehmed Beşe b. Hasan ve gayruhüm. Nikolaki v. Kostantin, Manolaki v. el-mezbûr, Yani v. Nikola, Kostantin v. Yani.