Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 86 Hüküm no: 58 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Vasil’in bağını Seyyid Hasan Paşa mahallesi avarızı vakfı mütevvellisi Ali Çelebi b. Ahmed’e istiğlâl yoluyla satıp tekrar bağı bir seneliğine kiraladığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden Dimitri v. Vasil nâm zimmî mahfil-i kazâda kasaba-i mezbûrede vâki‘ merhûm es-Seyyid Hasan Paşa avârızı vakfının nukūduna bi’l-fi‘il mütevellî olan Ali Çelebi b. Ahmed nâm kimesne muvâcehesinde ikrâr ve takrîr-i kelâm edüp silk-i mülkümde münselik olup karye-i mezbûre bağları sınırı dâhilinde Kasımdulu demekle ma‘rûf mevzi‘de vâki‘ bir tarafı İsmail Bey b. el-Hâc İbrahim tarlası ve bir tarafı yine kendi bağım ve bir tarafı Menyami nâm Yahudi bağı ve bir tarafı Angili bağı ve bazen vâdi ile mahdûd tahmînen beş dönüm mikdârı mülk harâbe bağ yerimi mezbûr Ali Çelebi’ye vakf-ı mezkûr mâlı ile beş bin nakd-i râyic fi’l-vakt fıddî akçeye bi-tarîki’l-istiğlâl bey‘ ve teslîm edüp ol dahi vech-i muharrer üzere alâ-tarîki’l-istiğlâl iştirâ ve tesellüm eyleyüp semeni olan meblağ-ı mezkûr beş bin akçeyi yedinden bi’t-tamâm ve’l-kemâl ahz u kabz eyledikden sonra bağ-ı mahdûd-ı mezkûru târih-i kitâbdan üç yüz altmış gün tamâmına değin yedi yüz elli akçeye mütevellî-i mezbûr Ali Çelebi’den istîcâr ve tesellüm edüp ol dahi vech-i muharrer üzere bağ-ı mezbûru bana îcâr ve teslîm eylemişdir dedikde gıbbe’t-tasdîki’ş-şer‘î kasaba-i <> Tophane mahallâtından Hoca Ali mahallesi sâkinlerinden İsmail Bey b. el-Hâc İbrahim nâm kimesne bağ-ı mezkûrun derkine ve karye-i mezbûrede sâkin Manol v. Arsin nâm zimmî dahi ücret-i mezkûru mahallinde edâya kefîl oldukları gıbbe’t-taleb mâ-vaka‘a ketb olundu. Fi’l-yevmi’l-hâmis ve’l-ışrîn min-Muharremi’l-harâm li-sene isneteyn ve sittîn ve elf. Şühûdü’l-hâl: Mahmud Çelebi b. el-Hâc Mehmed, Mehmed Bey b. Şaban Bey, Abdülbâkī Çelebi b. Derviş, el-Hâc Bâli b. Mahmud, Ahmed Çelebi b. İbrahim, Süleyman Çelebi b. Hasan, İsmail Çelebi b. Halil, Ahmed Çelebi b. Ali, Mustafa b. Mehmed Muhzır, Mehmed b. Ramazan Muhzır ve gayruhüm.