Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 87 Hüküm no: 59 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Çavuşzadeler’in Sinan Paşa Vakfı’na ait fırındaki hisselerini Topçubaşı Ali Ağa b. Mehmed’e sattıkları Mahmiye-i Galata muzâfâtından kasaba-i Beşiktaş’da sâkin Küçük Çavuşzâdeler Hüseyin Ağa ve Ali Ağa ve Halil Çelebi meclis-i şer‘de ve hemşireleri Nimet tarafından husûs-ı âti’l-beyâna vekîl olup nehc-i mu‘teber-i şer‘î üzere mezbûr Ali Ağa’nın vekâleti sâbite oldukdan sonra vekâleten işbu hâfızü’l-kitâb bi’l-fi‘il Topçubaşı olan Ali Ağa b. Mehmed mahzarında ikrâr ve i‘tirâf edüp Sinan Paşa Vakfı’ndan olup kasaba-i Tophâne’de vâki‘ ma‘lûmü’l-hudûd fırın yerinde olan altı sehm hisse-i şer‘iyyelerimizi iki bin beşer yüz akçeye cem‘an on beş bin akçeye mütevellî ma‘rifetiyle bey‘ ve tefvîz edüp ol dahi tefevvüz ve kabûl eyledikden sonra [18b] yedinden meblağ-ı mârrü’z-zikr on beş bin akçeyi yedinden bi’t-tamâm ve’l-kemâl ahz u kabz eyledik min-ba‘d alâka ve medhalimiz yokdur dediklerinde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn mine’l-Muharremi’l-harâm sene 1062 Şühûdü’l-hâl: Hüseyin Bey b. Mehmed, Mustafa b. Mehmed, Ali b. Mehmed ve gayruhüm.