Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 87 Hüküm no: 60 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey b. Hacı İbrahim’in iki bağını Manol v. Arsin’e sattığı Mahmiye-i Galata’ya tâbi‘ kasaba-i Tophane mahallâtından Hoca Ali mahallesi sâkinlerinden İsmail Bey b. el-Hâc İbrahim nâm kimesne mahfil-i kazâda işbu râfi‘ü’s-sifr Manol v. Arsin nâm zimmî muvâcehesinde bi-tav‘ihî ikrâr ve takrîr-i kelâm edüp mahmiye-i mezbûre muzâfâtından kasaba-i Beşiktaş’a tâbi‘ Orta nâm karye bağları sınırı dâhilinde vâki‘ bir tarafı yine kendi tarlam ve bir tarafı Arslan v. Anton bağı ve bir tarafı Karacaoğlu demekle ma‘rûf zimmî bağı ve bazen Arslan bağı ve bir tarafı tarîk-i âm ile mahdûd tahmînen on dönüm mikdârı mülk bağ ve bazı harâbe bağ yerimi merkūm Manol’e on bir bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm [ve] kabz eyledikden sonra semeni olan meblağ-ı mârrü’z-zikr on bir bin akçeyi yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan bağ ve harâbe bağ yeri mezbûr Manol nâm zimmînin mülk-i müşterâsı ve hakk-ı sırfıdır keyfe mâ yeşâ ve yehtâr sâir emlâki tasarrufu gibi mutasarrıf olsun dedikde mukırr-ı mezbûr İsmail Bey’in cârî ve sâdır olan ikrârını el-mukarru lehü’l-merkūm Manol bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Muharremi’l-harâm li-sene isneyn ve sittîn ve elf. Şühûdü’l-hâl: Mahmud Çelebi b. el-Hâc Mehmed, Ali Çelebi b. Ahmed, Mehmed Bey b. Şaban, Bâkī Çelebi b. Derviş, Arslan Beşe b. Hasan, Mahmud Efendi el-İmâm, Pîrî Bey b. Erdoğdu, Mehmed Beşe b. Hasan Odabaşı, Receb Beşe b. Hasan, Mustafa b. Mehmed Muhzır ve gayruhüm. Nikolaki v. Kostantin, Manolaki v. el-mezbûr, Kostantin v. Yani, Yani v. Nikola, Nikola v. Yorgi.