Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 88 Hüküm no: 61 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Arsin’in iki bağını Hayreddin Paşa Vakfı adına mütevellisi Mahmud Çelebi b. Hacı Mehmed’e istiğlal yoluyla satıp tekrar vakıftan kiraladığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden Manol v. Arsin nâm zimmî mahfil-i kazâda kasaba-i mezbûrede vâki‘ merhûm Hayreddin Paşa Vakfı’nın nukūduna bi’l-fi‘il mütevellî olan Mahmud Çelebi b. el-Hâc Mehmed nâm kimesne muvâcehesinde ikrâr ve takrîr-i kelâm edüp karye-i mezbûre bağları sınırı dâhilinde vâki‘ bir tarafı İsmail Bey b. el-Hâc İbrahim tarlası ve bir tarafı Arslan v. Anton bağı ve bir tarafı Karaca demek ile ma‘rûf zimmî bağı ve bazen Arslan bağı ve bir tarafı tarîk-i âm ile mahdûd tahmînen [19a] on dönüm mikdârı mülk bağ ve harâbe bağ yerimi mezbûr Mahmud Çelebi’ye vakf-ı mezkûr mâlı ile on bin nakd-i râyic fi’l-vakt fıddî akçeye bi-tarîki’l-istiğlâl bey‘ ve teslîm edüp ol dahi vech-i muharrer üzere alâ-tarîki’l-istiğlâl iştirâ ve tesellüm eyleyüp semeni olan meblağ-ı mezkûr on bin akçeyi yedinden bi’t-tamâm ve’l-kemâl ahz u kabz eyledikden sonra bağ-ı mahdûd-ı mezbûru târih-i kitâbdan üç yüz altmış gün tamâmına değin bin beş yüz akçeye mütevellî-i merkūm Mahmud Çelebi’den istîcâr ve tesellüm edüp ol dahi vech-i meşrûh üzere bağ-ı mezbûru bana îcâr ve def‘ ve teslîm eylemişdir dedikde gıbbe’t-tasdîki’ş-şer‘î kasaba-i Tophane mahallâtından Hoca Ali mahallesi sâkinlerinden İsmail Bey b. el-Hâc İbrahim nâm kimesne bağ-ı mezbûrun derkine kefîl ve ücret-i mezbûreyi mahallinde edâya Dimitri v. Vasil nâm zimmî dahi kefîl oldukları mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Muharremi’l-harâm li-sene isneyn ve sittîn ve elf. Şühûdü’l-hâl: Ali Çelebi b. Ahmed, Mehmed Bey b. Şaban, el-Hâc Bâli b. Mahmud, Ahmed Çelebi b. İbrahim, Süleyman Çelebi b. Hasan, İsmail Çelebi b. Halil, Ahmed Çelebi b. Ali, Abdülbâkī b. Derviş, Mehmed b. Ramazan Muhzır, Mustafa Muhzır ve gayruhüm.