Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 88 Hüküm no: 62 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Kiro’nun ölen kardeşi Kiroş’un terekesini elinde bulunduran Dimo v. Yaso’dan 22 riyalî guruş alarak sulh olduğu Vilâyet-i Rumeli’nde Eğri kazâsına tâbi‘ Lipohova nâm karye sâkinlerinden Tanaş v. Kiro nâm zimmî meclis-i şer‘-i hatîr-i lâzımü’t-tevkīrde mahmiye-i Galata muzâfâtından kasaba-i Beşiktaş’da ekmekçi tâifesinden işbu râfi‘ü’s-sifr Dimo v. Yaso nâm zimmî muvâcehesinde bi-tav‘ihî ikrâr ve takrîr-i kelâm edüp târih-i kitâbdan bir sene mukaddem mahrûse-i İstanbul’da Arabacılar meydânında sâkin iken hâlik olan karındaşım Kiroş nâm zimmînin yüz on beş guruşunu ve sâir terekesin mezbûr Dimo ahz u kabz eylemiş idi hâlâ verâsetim hasebiyle ben dahi meblağ-ı mezkûru mezbûr Dimo’dan da‘vâ ve taleb eylediğimde mezbûr Dimo inkâr ben dahi isbât sadedinde iken beynimize muslihûn ve Müslimûn tavassut edüp “es-sulhu seyyidü’l-ahkâm” fehvâsınca meblağ-ı mezkûr ve sâir tereke mukābelesinde yirmi iki aded riyâlî guruş-ı kebîre akd-i sulh inşâ eylediklerinde ben dahi sulh-ı mezbûru kabûl ve bedel-i sulh olan meblağ-ı mezkûr yirmi iki aded riyâlî guruş-ı kebîri mezbûr Dimo yedinden bi-tamâmihî ahz u kabz eyleyüp zimmetini husûs-ı mezbûra müte‘allik da‘vâdan ibrâ-i âmm-ı kātı‘ü’n-nizâ‘ ile ibrâ ve ıskāt eyledim ba‘de’l-yevm mazmûn-ı kitâba muhâlif benden veya vekîlimden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Muharremi’l-harâm li-sene isneteyn ve sittîn ve elf. Şühûdü’l-hâl: Ali Bey b. Mustafa el-Cündî, Sinan Bey b. Ali Bey, Müstakīm Bey el-Mübâşir, es-Seyyid Mehmed Çelebi b. Ali, Ahmed Beşe b. Mehmed, Kadri Çelebi b. Mehmed, Receb b. Mustafa, Yusuf Beşe b. Abdullah, Mustafa b. Mehmed Muhzır, Mehmed b. Mustafa Muhzır ve gayruhüm. Nikola v. Dimo, Yanaki v. Hristo, Yani v. Yorgi, İstemad v. Dimo. Sahh, sahh, sahh, sahh, sahh, sahh.