Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 89 Hüküm no: 63 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andoni v. Dozi’nin Ali Bey b. Kasım Paşa’nın satın aldığı Rus asıllı köle Vasil v. Kozma’ya kefil olduğu Merhûm Sinan Paşa zindânında sâkin Andoni v. Dozi mahfil-i kazâda iftihârü’l-ümerâ Ali Bey b. Kasım Paşa kıbelinden husûs-ı âti’l-beyâna vekîl olup nehc-i mu‘teber-i şer‘î üzere vekâleti sâbite olan vardiyânbaşıları el-Hâc Ali b. Ahmed muvâcehesinde ikrâr ve takrîr-i kelâm edüp müşârun ileyh Ali Bey’in esîrlerinden olup iki yüz kırk guruş kıymetli açık kaşlı gök elâ gözlü Rusiyyü’l-asl hâzır bi’l-meclis Vasil v. Kozma nâm esîrin nefsine ve gaybet ederse kıymetine emr ve kabûlü hâviye kefâlet ile kefîl bi’l-mâl oldum mezbûr Vasil firâr ederse kendi malımdan zâmin olurum deyicek mukırr-ı mezbûr Andoni’nin kelâmını vekîli mârrü’z-zikr bi’l-müvâcehe tasdîk ve bi’l-müşâfehe tahkīk etmeğin mâ-hüve’l-vâkı‘ gıbbe’t-taleb ketb olundu. Hurrire fi’l-yevmi’s-sâmin ve’l-ışrîn mine’l-Muharremi’l-harâm li-sene isneyn ve sittîn ve elf. Şühûdü’l-hâl: Musa Bey b. Cafer Bey, Bayram Ağa b. Abdullah, diğer Bayram Ağa, Mehmed Çelebi b. Musa, İbrahim Beşe b. Mehmed, Mehmed b. Ahmed, Mehmed Çelebi b. Veli, el-Hâc Yusuf b. Abdullah ve gayruhüm.