Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 90 Hüküm no: 64 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Natali v. Yortes ve Yani v. Nikola’nın Ali Bey b. Kasım Paşa’nın Rus asıllı kölesi Kozma v. Yuvan’a kefil oldukları Mahmiye-i Galata’ya tâbi‘ kasaba-i Beşiktaş mahallâtından Sinan Paşa-yı Cedîd mahallesi sâkinlerinden Natali v. Portes ve mahalle-i mezbûrede vâki‘ merhûm Hasan Paşa zindânında sâkin Yani v. Nikola nâm zimmîler mahfil-i kazâda mahalle-i mezbûre sâkinlerinden iftihârü’l-ümerâ’i’l-kirâm Ali Bey b. el-merhûm Kasım Paşa tarafından husûs-ı âti’l-beyânı kabûl ve tasdîka nehc-i şer‘î üzere vekîl olan hâmilü hâze’l-kitâb vardiyânbaşıları el-Hâc Ali b. Ahmed nâm kimesne muvâcehesinde herbiri ikrâr ve takrîr-i kelâm edüp müşârun ileyh Ali Bey’in esîrlerinden olup işbu hâzır bi’l-meclis orta boylu açık kaşlı siyâh gözlü Rusiyyü’l-asl Kozma v. Yuvan nâm esîrin mâdâmki âl-i Osmân halledallâhu hilâfetehû hazretlerinin taht-ı hükûmetlerinde olan vilâyetlerde bilâ-hadîd yürüyüp ve eğer bilâd-ı İslâm’da dahi bazı hisâr altlarına varılırsa yine bilâ-hadîd yürümek şartı ile evvelen herbirimiz nefsine ve sâniyen firâr edüp gaybet-i münkatı‘a ile gaybet ederse kendi mâllarımız ile herbirimiz yüzer guruş kıymetli birer esîr iştirâ edüp mezbûr Kozma’nın mukābelesinde vermesine ta‘ahhüd ve emr-i kabûlü hâviye kefâlet-i sahîha-i şer‘iyye ile kefîl olduk dediklerinde mukırrân-ı mezbûrânın bi’l-vekâle cârî ve sâdır olan kelâmını vekîl-i merkūm el-Hâc Ali kabûl ve tasdîk etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Muharremi’l-harâm li-sene isneteyn ve sittîn ve elf. Şühûdü’l-hâl: Şuhûdü’s-sâbıkūn, es-sâbıkūn, şuhûd şuhûdü’s-sâbıkūn.