Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 90 Hüküm no: 65 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Mehmed’in çocukları Hüseyin ve Saliha’ya babaları Hasan Çelebi b. Ahmed’in vasi ve Mustafa Çelebi b. Mehmed’in de nâzır tayini Mahmiye-i Galata’ya tâbi‘ kasaba-i Beşiktaş mahallâtından Maçka mahallesinde sâkine iken bundan akdem müteveffât olan Âişe Hatun bt. Mehmed’in sagīr oğlu Hüseyin’in ve sagīre kızı Saliha’nın emvâlini zabt ve hıfza bir vasî lâzım ve mühim olmağın hâkim-i muvakki‘-i kitâb tûbâ-lehû ve hüsnü-meâb dahi sagīrân-ı mezbûrânın babaları işbu bâ‘isü’l-kitâb Hasan Çelebi b. Ahmed nâm kimesne vesâyet-i umûruna ehil ve her vechile sagīrân-ı mezbûrâna enfa‘ ve evlâ olmağın sagīrân-ı mezbûrâna vâlideleri mezbûre Âişe Hâtûn’dan irs-i şer‘le intikāl eyleyen on yedi bin beş yüz akçe hisse-i şer‘iyyelerini hıfz ve hırâset eylemeğe savb-ı şer‘den vasî nasb u ta‘yîn olunup merkūm Hasan Çelebi dahi vech-i meşrûh üzere vesâyet-i merkūmeyi kabûl ve meblağ-ı mezkûru ahz u kabz eyleyüp ve hizmet-i lâzımesin edâya ta‘ahhüd ve iltizâm eyledikden sonra mahmiye-i mezbûre tevâbi‘inden Kasımpaşa’da el-Hâc Hasan mahallesi sükkânından Mustafa Çelebi b. Mehmed nâm kimesne dahi sagīrân-ı mezbûrânın emvâline nâzır ta‘yîn olunması enfa‘ ve enseb olmağın cânib-i şer‘den vasiyy-i merkūm üzerine nâzır nasb u ta‘yîn olunup ol dahi nezâret-i mezkûrenin mûcebini iltizâm eyleyüp ve vasiyy-i merkūm sagīrân-ı mersûmânın emvâlini mu‘âmele-i şer‘iyye ile irbâh eyledikçe nâzır-ı merkūmun re’y ve ma‘rifetiyle irbâh eyleye deyü mâ-vaka‘a bi’t-taleb ketb olunup tarafeynin yedlerine işbu vesîka def‘ olundu. Tahrîren fî-gurre min-Saferi’l-hayr li-sene isneteyn ve sittîn ve elf. Şühûdü’l-hâl: Eşref Efendi el-Hatîb, Ahmed Çelebi b. Cafer Müezzin, İbrahim Çelebi b. Mehmed, Nasûh Çelebi b. Musa, el-Hâc Mehmed b. Mustafa, Derviş Süleyman b. Abdullah, Ahmed Beşe b. Mehmed, Mustafa Beşe [b.] Mehmed, Mustafa Muhzır, Mehmed Muhzır ve gayruhüm.