Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 91 Hüküm no: 66 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Çavuşzâdeler’den Hüseyin Ağa’nın vasisi olduğu çocukların Sinan Paşa Vakfı’ndan olan fırındaki hisselerini ihtiyaçları için Ali Ağa b. Mehmed’e sattığı Mahmiye-i Galata muzâfâtından kasaba-i Beşiktaş’da bundan esbak merhûm olan Küçük Çavuşzâdelere kıbel-i şer‘den vasiyy-i mansûbları olan sulbî kebîr oğlu Hüseyin Ağa mahfil-i kazâda Çulcu nâm Ali Ağa b. Mehmed muvâcehesinde ikrâr ve i‘tirâf edüp vasîsi olduğum sıgārûnlardan karındaşım Halil Çelebi ve Osman Çelebi’nin Sinan Paşa Vakfı’ndan kasaba-i Tophâne’de vâki‘ bir tarafı mezbûr Ali Ağa mülkü ve bir tarafı vakf-ı mezbûr ve iki tarafı tarîk-i âm ile mahdûd sâbıkā muhterik olup cem‘an on hisse olan fırın arsasında vâki‘ birer hisse-i şer‘iyyeleri zarûret-i nafaka ve kisveleri’çün âhara tefvîz olunmak lâzım gelmeğin müzâyede olunup rağabât-ı nâs münkatı‘a oldukdan sonra üçer bin akçede mezbûr Ali Ağa üzerinde karâr edüp ziyâde ile âhar tâlibi olmamağın elli bin nakd-i fıddî râyic fi’l-vakt akçeye mütevellî-i vakf-ı mezbûr ile tefvîz ve teslîm edüp ol dahi tefevvüz ve kabûl eyledikden sonra mukābele-i tefvîzde [20b] yedinden altı bin akçe ahz u kabz eyledim ba‘de’l-yevm mâh be-mâh ta‘yîn olunan icâresin cânib-i vakfa edâ eyleye kimesne tasarrufuna mâni‘ ve müzâhim olmasın deyicek gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Hurrire fi’l-yevmi’s-sânî min-Saferi’l-hayr li-sene isneteyn ve sittîn ve elf. Şühûdü’l-hâl: İbrahim Bey b. Abdullah, Ali Ağa b. Mehmed Ağa, Mustafa Çelebi b. Ali, Ömer Bey b. Ali, el-Hâc Ali, Mustafa Çelebi b. Mehmed ve gayruhüm.