Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 94 Hüküm no: 71 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Murad’ın Rus asıllı cariyesi Peymane bt. Abdullah’ı azad ettiği Mahmiye-i Galata’ya tâbi‘ kasaba-i Beşiktaş mahallâtından <> Sinan Paşa-yı Cedîd mahallesi sâkinelerinden Fâtıma Hatun bt. Murad tarafından ıtk-ı âti’l-beyânı ikrâra vekîl olup mezbûreyi ma‘rifet-i şer‘iyye ile ârifân olan el-Hâc Yusuf b. Abdullah ve Mustafa Beşe b. Ali nâm kimesneler şehâdetleri ile şer‘an vekâleti sâbite olan Eşref Efendi b. Veli nâm kimesne mahfil-i kazâda müvekkilem mezbûre Fâtıma’ya rıkkı mu‘terif[e] olan orta boylu açık kaşlı sarışın ve gök gözlü Rusiyyetü’l-asl işbu râfi‘atü’l-kitâb Peymâne bt. Abdullah nâm câriye muvâcehesinde ikrâr ve takrîr-i kelâm edüp evsâf-ı mezkûre ile mevsûfe olan mezbûre Peymâne’yi müvekkilem mezbûre Fâtıma Hatun ibtigāen li-vechi’l-kerîm ve beriyyen an ikābihi’l-elîm i‘tâk ve mülkünden ihrâc ve silk-i harâir-i asliyyîne idrâc eyledi ba‘de’l-yevm mezbûre Peymâne sâir harâir-i asliyyât gibi hürre olup üzerinde hakk-ı velâdan gayrı hakkı kalmadı dedikde vekîl-i mezbûr Eşref Efendi’nin cârî ve sâdır olan ikrârını mezbûre Peymâne talebiyle ketb olundu. Tahrîren fi’l-yevmi’s-sâmin min-Saferi’l-hayr li-sene isneyn ve sittîn ve elf. Şühûdü’l-hâl: Abdülkerim Çelebi el-İmâm, Enver Efendi b. Salih, Bâli Bey el-Cündî, Rıdvan Bey, Ramazan Reis, Ali Çelebi b. Cafer Müezzin, Hudâverdi Beşe b. Abdullah, Mustafa b. Mehmed, Mehmed b. Ramazan Muhzır ve gayruhüm.