Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 94 Hüküm no: 72 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan b. Abdullah’ın evini Kiryazi v. Papas’a sattığı Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karye sükkânından Rıdvan Bey b. Abdullah nâm kimesne meclis-i şer‘-i şerîf-i hatîr-i lâzımü’t-tevkīrde işbu râfi‘ü’s-sifr Kiryazi v. Papas nâm zimmî muvâcehesinde bi-tav‘ihî ikrâr ve takrîr-i kelâm edüp silk-i mülkümde münselik olup karye-i mezbûrede vâki‘ bir tarafı Âişe ve Mehmed mülkleri ve bir tarafı Lanborloz nâm zimmî mülkü ve bir tarafı Medîne-i Münevvere Vakfı ve bir tarafı tarîk-i âm ile mahdûd ve mümtâz bir bâb fevkānî odayı [22a] ve bir bâb matbah odasını ve tahtânî bir bâb odayı ve önünde vâki‘ limanı ve dehlîzi ve muhavvatayı ve kenîfi müştemil mülk menzilimi cümle tevâbi‘ ve levâhıkı ile mezbûr Kiryazi nâm zimmîye iki yüz yirmi kıt‘a tâmmü’l-vezn ve kâmilü’l-ayâr riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr iki yüz yirmi kıt‘a riyâlî guruşu yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden menzil merkūm Kiryazi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde mukırr-ı mezbûr Rıdvan Bey’in cârî ve sâdır olan ikrârını el-mukarru lehü’l-merkūm Kiryazi vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâdis aşer min-Saferi’l-hayr li-sene isneteyn ve sittîn ve elf. Şühûdü’l-hâl: Mustafa Efendi el-İmâm, Mehmed Bey b. Muslu, Hasan Ağa b. Abdullah, Mehmed Beşe b. Abdullah, Mehmed Beşe b. Şaban, İsmail Beşe b. Muhsin, Mehmed Bey b. Abdullah, Hüseyin Beşe b. Mehmed, Nasûh Çelebi [b.] Musa, Mehmed Çelebi b. Ramazan, Zülfikār b. Mehmed, Mustafa b. Mehmed Muhzır.