Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 95 Hüküm no: 73 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manolaki v. Kostantin’in Rus asıllı cariyesi Eneste’yi azad ettiği Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden Manolaki v. Kostantin nâm zimmî tarafından ıtk-ı âti’l-beyânı ikrâra vekîl olup mezbûru ma‘rifet-i şer‘iyye ile ârifân olan Manol v. Yorgi ve Zafiri v. Angili nâm zimmîler şehâdetleriyle şer‘an vekâleti sâbit olan Todori v. Yorgi nâm zimmî meclis-i şer‘-i şerîf-i lâzımü’t-teşrîfde müvekkilim mezbûr Manolaki’ye rıkkı mu‘terife olan orta boylu açık kaşlı gök gözlü ve sol kaşı üstünde eser-i cerhi olup Moskoviyyetü’l-asl işbu râfi‘atü’s-sifr Eneste bt. ( ) nâm câriye muvâcehesinde bi’l-vekâle ikrâr ve takrîr-i kelâm edüp evsâf-ı mezkûre ile mevsûfe olan merkūme Eneste’yi müvekkilim mezbûr Manolaki lâ li-vazin âcil velâ li-garazin âcil mülkünden ihrâc ve silk-i harâir-i asliyyîne idrâc eyledi ba‘de’l-yevm merkūme Eneste sâir harâir-i asliyyât gibi hürre olup üzerinde hakk-ı velâdan gayrı hakkı kalmadı dedikde mukırr-ı mezbûr Todori’nin bi’l-vekâle cârî ve sâdır olan ikrârı mezbûre Eneste talebiyle ketb olundu. Fi’l-yevmi’l-hâmis aşer min-Saferi’l-hayr li-sene isneyn ve sittîn ve elf. Şühûdü’l-hâl: Arslan Beşe b. Hasan, Nasûh Çelebi b. Musa, Mehmed Beşe b. Hasan, Zülfikār b. Mehmed, Halil b. Haydar, Receb Tellâk, Ahmed Beşe [b.] Abdullah, Ömer b. Hasan, Mustafa Muhzır, Mehmed Muhzır ve gayruhüm. Beyâz sahh, beyâz sahh.