Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 96 Hüküm no: 74 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hibetullah Hatun bt. Ali Çelebi’nin Kılıç Ali Paşa Vakfı’ndan tasarrufundaki evi Hibetullah Hatun bt. Ali Çelebi’ye sattığı Mahmiye-i Galata’ya tâbi‘ kasaba-i Beşiktaş’a vâki‘ merhûm Kılıç Ali Paşa’nın utekāsına ve evlâd-ı utekāsına vakfı olup lede’l-ahâlî tahdîd ve tavsîfden müstağnî sarayında sâkine merhûm-ı müşârun ileyhin utekāsı evlâdından İsmihân bt. Yusuf nâm Hatun mahfil-i kazâda yine utekā-yı mezbûre evlâdından işbu râfi‘atü’l-kitâb Hibetullah Hatun bt. Ali Çelebi tarafından husûs-ı âti’l-beyânı tasdîka ve semen-i âti’z-zikri teslîme vekîl olup bimâ hüve nehci’s-sübût şer‘an vekâleti sâbite olan mezbûr Ali Çelebi muvâcehesinde bi-tav‘ihâ ikrâr ve takrîr-i kelâm edüp saray-ı mezbûrdan olup meşrûtiyyet üzere taht-ı tasarrufumda olan vakf menzilin bir tarafı a‘lemü’l-ulemâ Bâkīzâde Efendi mülkü ve bir tarafı vâlidem Âişe Hatun’un mutasarrıfe olduğu vakıf menzil ve bir tarafı Bayram Ağa mutasarrıf olduğu vakıf menzil ve bir tarafı leb-i deryâ ile mahdûd iki bâb fevkānî oda ve bir şehnişîni ve bir bâb küçük odayı ve kenîfi müştemil olan menzil harâba müşrif olup ta‘mîre iktidârım olmamağile mersûme Hibetullah Hatun menzil-i mezkûru ta‘mîr eylemeğe ta‘ahhüd eyleyüp ve menzil-i mezkûrun ta‘mîr olunması min-külli’l-vücûh taraf-ı vakfa enfa‘ ve evlâ olmağın ben dahi kendi hüsn-i irâdetim ile menzil-i mezbûrun hakk-ı tasarrufunu on iki bin nakd-i râyic fi’l-vakt akçeye mezbûre Hibetullah nâm hatuna ferâğ ve tefvîz ol dahi vech-i muharrer üzere tefevvüz ve kabûl ve menzil-i merkūmu ta‘mîre ta‘ahhüd eyledikden sonra bedel-i ferâğ olan meblağ-ı mârrü’z-zikri vekîl-i mersûm Ali Çelebi yedinden bi-tamâmihî ahz u kabz eyledim ba‘de’l-yevm menzil-i vakf-ı mezbûru merkūme Hibetullah Hatun sâir emsâli tasarrufu gibi mutasarrıfe olsun dedikde mukırre-i mezbûre İsmihân Hatun’un cârî ve sâdır olan ikrârını vekîl-i mersûm Ali Çelebi bi’l-müvâcehe tasdîk ve bi’l-müşâfehe tahkīk etmeğin işbu hurûf ber-sebîl-i temessük ketb olundu. Tahrîren fi’l-yevmi’r-râbi‘ aşer min-Saferi’l-hayr li-sene isneteyn ve sittîn ve elf. Şühûdü’l-hâl: Eşref Efendi el-Hatîb, Receb Bey b. Şaban, Mehmed Ağa b. Mustafa, Yahya Çelebi b. Perviz, Ahmed Çelebi b. Cafer Müezzin, Mahmud Çelebi b. Mehmed, Mahmud Çelebi b. Şaban, Hasan Bey b. Dost Mehmed, Mehmed Çelebi b. Ali Çelebi, Lütfü Çelebi b. el-mezbûr, Yahya Çelebi b. Hasan Müezzin, Mehmed Çelebi b. Veli ve gayruhüm mine’l-hâzırîn. Beyaz sahh.