Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 96 Hüküm no: 75 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Sinan’ın Tanas v. Kolyo’da kalan alacağını aldığı Dârü’l-hilâfeti’l-aliyye Kostantıniyyetü’l-mahmiyye mahallâtından Küçükkaraman’da sâkin Mustafa b. Sinan nâm kimesne mahfil-i kazâda kasaba-i Beşiktaş’a tâbi‘ Arnavud nâm karye sâkinlerinden işbu râfi‘ü’s-sifr Tanas v. Kolyo nâm zimmî muvâcehesinde bi-tav‘ihî ikrâr ve takrîr-i kelâm edüp bundan akdem mezbûr Tanas üç bin akçe kıymetli ma‘lûmü’l-vasf bir katırımı ve bazı nühâsımı nehb ü gāret eyleyüp da‘vâ ve taleb eylediğimde beynimizde nice münâza‘ât-ı kesîre vâkı‘a olup an-inkârin beş bin akçeye eşyâ-yı mezkûre mukābelesinde sulh olup bedel-i sulhdan iki bin akçesin ahz u kabz eyleyüp bâkī üç bin akçe zimmetinde kalmış idi hâlâ meblağ-ı bâkī olan üç bin akçeyi dahi mezbûr Tanas yedinden bi’t-tamâm ve’l-kemâl alıp zimmetinde meblağ-ı mezkûrdan bir akçe ve bir habbe hakkım bâkī kalmayıp ve husûs-ı mersûma müta‘allik da‘vâdan dahi zimmetini ibrâ-i âmm-ı kātı‘ü’n-nizâ‘ ile ibrâ ve ıskāt eyledim ba‘de’l-yevm mazmûn-ı kitâba muhâlif benden veya vekîlimden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmasın dedikde mukırr-ı mezbûr Mustafa Bey vech-i meşrûh üzere cârî ve sâdır olan ikrârını merkūm Tanas talebiyle ketb olunup yedine def‘ olundu. Tahrîren fi’l-yevmi’s-sâbi‘ min-Saferi’l-hayr li-sene isneyn ve sittîn ve elf. Şühûdü’l-hâl: Hüseyin Usta b. Abdülmennan, Mahmud Efendi b. Osman, Hudâverdi Beşe b. Abdullah, Zülfikār Bey b. Mehmed, Mustafa Beşe b. Mehmed Muhzır, Hamza Beşe b. Abdullah, Mehmed Çelebi b. Ramazan, Cafer Beşe b. Mehmed, Nasûh Çelebi b. Musa, Ali Bey b. Mustafa ve gayruhüm.